భారత ఆసుపత్రుల్లోకి విదేశీ పీఈ పెట్టుబడులు..

ఈవై నివేదిక ప్రకారం.. బ్లాక్‌స్టోన్, కేకేఆర్, టీపీజీ, జనరల్‌ అట్లాంటిక్‌ వంటి విదేశీ ప్రైవేట్‌ ఈక్విటీ సంస్థలు గత ఐదేళ్లలో భారత ఆసుపత్రి రంగంలో దాదాపు 10 బిలియన్‌ డాలర్లు అంటే సుమారు రూ.96,200 కోట్ల పెట్టుబడులు పెట్టాయి. ఈ నిధులతో ఆసుపత్రుల విస్తరణ, కొత్త పడకల ఏర్పాటు, ఆధునిక వైద్య పరికరాలు, సాంకేతికత అందుబాటులోకి వస్తున్నాయి. చిన్న, మధ్యతరహా ఆసుపత్రులు పెద్ద హాస్పిటల్‌ నెట్‌వర్క్‌లలో విలీనం కావడం కూడా వేగం పుంజుకుంది. అయితే విదేశీ పీఈ పెట్టుబడుల పెరుగుదలతో చికిత్స ఖర్చులు కూడా పెరుగుతున్నాయన్న ఆందోళనలు వ్యక్తమవుతున్నాయి. వైద్య ద్రవ్యోల్బణం ఏటా సుమారు 13 శాతానికి చేరినట్లు పార్లమెంటరీ సంఘం పేర్కొంది.

ఆసుపత్రులను స్వాధీనం చేసుకున్న తర్వాత పూర్తిస్థాయిలో కార్యకలాపాలు ప్రారంభమైతే నిరంతర ఆదాయ ప్రవాహానికి అవకాశం ఉండటంతో పీఈ సంస్థలు ఈ రంగంపై ఆసక్తి చూపుతున్నాయి. పలు ఆసుపత్రులను ఒకే నెట్‌వర్క్‌ కిందకు తీసుకువచ్చి సేవలను ఏకీకృతం చేయడం ద్వారా నిర్వహణ సామర్థ్యాన్ని పెంచుతున్నాయి. దేశంలో ఆసుపత్రి మౌలిక వసతుల కొరత, ప్రజల ఆదాయాలు మరియు ఆయుర్దాయం పెరగడం, క్యాన్సర్‌, గుండె, కిడ్నీ సంబంధిత వ్యాధుల పెరుగుదలతో ప్రత్యేక వైద్య సేవలకు డిమాండ్‌ అధికమవుతోంది. పీఈ పెట్టుబడులున్న ఆసుపత్రుల పడకలు మొత్తం దేశీయ పడకల్లో సుమారు 5 శాతమే అయినప్పటికీ, గుండె శస్త్రచికిత్సలు, క్యాన్సర్‌ చికిత్స వంటి అధిక ఆదాయ విభాగాల్లో వీటి వాటా ఎక్కువగా ఉందని పరిశ్రమ వర్గాలు చెబుతున్నాయి. సాధారణ ఆసుపత్రులతో పోలిస్తే ఇక్కడ చికిత్స ఖర్చులు 5 నుంచి 10 రెట్లు అధికంగా ఉండొచ్చని పార్లమెంటరీ కమిటీ ఆందోళన వ్యక్తం చేసింది. అధిక బిల్లుల కారణంగా బీమా క్లెయిమ్‌లు, భవిష్యత్‌ ప్రీమియంలు పెరిగే ప్రమాదం ఉందని బీమా సంస్థలు చెబుతున్నాయి. ఈ నేపథ్యంలో ఆసుపత్రుల్లో విదేశీ పెట్టుబడుల నిబంధనలను పునఃపరిశీలించి, చికిత్సా సేవల ధరలకు గరిష్ఠ పరిమితులు విధించాలని పార్లమెంటరీ సంఘం సూచించింది.