ఎస్‌ఐఆర్‌ ధ్రువీకరణకు ఫ్యామిలీ రిజిస్టర్‌ సర్టిఫికెట్‌ చెల్లదు - ఈసీఐ

ఓటర్ల జాబితా ప్రత్యేక సమగ్ర సవరణ (SIR)లో ఓటర్ల ధ్రువీకరణకు ఫ్యామిలీ రిజిస్టర్‌ సర్టిఫికెట్‌ను చెల్లుబాటు అయ్యే పత్రంగా ఆమోదించలేమని కేంద్ర ఎన్నికల సంఘం (ECI) స్పష్టం చేసింది. ఫ్యామిలీ రిజిస్టర్‌ సర్టిఫికెట్‌ జారీకి సంబంధించి తెలంగాణ ప్రభుత్వం జులై 25న ఉత్తర్వులు జారీ చేసింది. రేషన్‌ కార్డు డేటా ఆధారంగా ఈ సర్టిఫికెట్‌ను జారీ చేసేలా ఆదేశాలు ఇచ్చిన నేపథ్యంలో ఈసీఐ తాజాగా ఈ అంశంపై స్పష్టత ఇచ్చింది. SIR ప్రక్రియలో ధ్రువీకరణ పత్రంగా ఫ్యామిలీ రిజిస్టర్‌ సర్టిఫికెట్‌ను పరిగణించలేమని పేర్కొంది.

కేంద్ర ప్రధాన ఎన్నికల కమిషనర్‌ (CEC) కూడా ఫ్యామిలీ రిజిస్టర్‌ సర్టిఫికెట్‌ రేషన్‌ కార్డుతో సమానమైనదేనని స్పష్టం చేసినట్లు సమాచారం. అందువల్ల రేషన్‌ కార్డుకు అదనంగా ప్రత్యేక ధ్రువీకరణ పత్రంగా ఫ్యామిలీ రిజిస్టర్‌ సర్టిఫికెట్‌ను అంగీకరించడం సాధ్యం కాదని ఈసీఐ తేల్చింది. ఓటర్ల జాబితా సవరణలో భాగంగా తమ వివరాలను ధ్రువీకరించుకునే వారు ఎన్నికల సంఘం గుర్తించిన పత్రాలను మాత్రమే సమర్పించాల్సి ఉంటుంది.