మళ్లీ కరోనా కలకలం.. పలు దేశాల్లో కొత్త వేరియంట్ PJ.2.1 గుర్తింపు

ప్రపంచంలోని పలు దేశాల్లో కొత్త కరోనా వేరియంట్ PJ.2.1 గుర్తించినట్లు సమాచారం. 2026 మే 2న కెనడాలో తొలిసారిగా ఈ వేరియంట్‌ను గుర్తించగా, ఆ తర్వాత అమెరికా, ఫ్రాన్స్, సింగపూర్, ఆస్ట్రేలియా తదితర దేశాల్లోనూ కేసులు నమోదైనట్లు తెలుస్తోంది. ఈ వేరియంట్‌కు సంబంధించి వైరస్ స్పైక్ ప్రోటీన్‌లో జన్యుపరమైన మార్పులు ఉన్నట్లు పరిశోధకులు గుర్తించినట్లు సమాచారం. వైరస్ మానవ కణాల్లోకి ప్రవేశించడంలో స్పైక్ ప్రోటీన్ కీలక పాత్ర పోషిస్తుంది.

PJ.2.1 వేరియంట్ సోకినవారిలో జ్వరం, దగ్గు, గొంతునొప్పి, ముక్కు కారడం, తలనొప్పి, ఒళ్లు నొప్పులు, తీవ్రమైన అలసట వంటి లక్షణాలు కనిపించవచ్చని పేర్కొంటున్నారు. అయితే, గత కరోనా వేరియంట్లతో పోలిస్తే ఇది ఎక్కువ ప్రమాదకరమని ఇప్పటివరకు నిర్ధారణ కాలేదు. వృద్ధులు, మధుమేహం, గుండె సంబంధిత వ్యాధులతో బాధపడుతున్నవారు అప్రమత్తంగా ఉండాలని సూచిస్తున్నారు. భారత్‌లో PJ.2.1 వేరియంట్ కేసులకు సంబంధించి ప్రస్తుతం నిర్ధారిత సమాచారం అందుబాటులో లేదు. ఈ వేరియంట్ వ్యాప్తి, ప్రభావంపై మరింత స్పష్టత రావాలంటే ఆరోగ్య శాఖల అధికారిక ప్రకటనలు, పరిశోధన ఫలితాల కోసం వేచి చూడాల్సి ఉంది.