తుఫాన్ ప్రభావిత ప్రాంతాల్లో రెండో రోజు సీఎం చంద్రబాబు పర్యటన

అర్నబ్ తుఫాన్ ప్రభావిత ప్రాంతాల్లో ముఖ్యమంత్రి నారా చంద్రబాబు నాయుడు శుక్రవారం వరుసగా రెండో రోజు పర్యటించనున్నారు. పశ్చిమ గోదావరి జిల్లాలోని మొగల్తూరు, నరసాపురం ప్రాంతాల్లో పర్యటించి తుఫాన్ కారణంగా జరిగిన నష్టాన్ని పరిశీలించనున్నారు. మధ్యాహ్నం 12 గంటలకు అమరావతి నుంచి బయలుదేరనున్న ముఖ్యమంత్రి, మొగల్తూరు చేరుకున్న తర్వాత నవరసపురం గ్రామంలో దెబ్బతిన్న పంటలను పరిశీలిస్తారు. ఈ సందర్భంగా రైతులతో మాట్లాడి పంట నష్టం, వారు ఎదుర్కొంటున్న ఇబ్బందుల గురించి తెలుసుకోనున్నారు.

అనంతరం తుఫాన్ ప్రభావిత మాట్రేవు గ్రామంలో ఏర్పాటు చేసిన పునరావాస శిబిరాన్ని సీఎం సందర్శించి బాధితులను పరామర్శించనున్నారు. ఆయా ప్రాంతాల్లో కొనసాగుతున్న సహాయక చర్యలు, పునరావాస కార్యక్రమాల పురోగతిపై అధికారులను అడిగి తెలుసుకోనున్నారు. గురువారం డాక్టర్ బీఆర్ అంబేద్కర్ కోనసీమ జిల్లాలోని ముమ్మిడివరం ప్రాంతంలో తుఫాన్ ప్రభావిత గ్రామాల్లో చంద్రబాబు పర్యటించారు. తాజాగా రెండో రోజు కూడా క్షేత్రస్థాయిలో పర్యటిస్తూ బాధితుల సమస్యలు, నష్టాలను స్వయంగా తెలుసుకోనున్నారు.