తుపాను బాధితులకు పరిహారం త్వరగా అందించాలి.. అధికారులకు చంద్రబాబు ఆదేశం

ఏపీలో అర్నబ్‌ తుపాను అనంతర పరిస్థితులపై ముఖ్యమంత్రి చంద్రబాబు జిల్లా కలెక్టర్లు, అధికారులతో టెలికాన్ఫరెన్స్‌ నిర్వహించారు. తుపాను ప్రభావిత ప్రాంతాల్లో క్షేత్రస్థాయిలో సాధారణ పరిస్థితులు పూర్తిగా నెలకొనే వరకు అధికారులు విశ్రాంతి తీసుకోవద్దని స్పష్టం చేశారు. కొన్ని ప్రాంతాలు మినహా మిగిలిన చోట్ల పరిస్థితులు సాధారణ స్థితికి చేరుకుంటున్నాయని అధికారులు సీఎంకు వివరించారు. తుపాను నష్టంపై ప్రాథమిక నివేదికను అదే రోజు పంపాలని, బాధితులకు పరిహారం అందించే ప్రక్రియను వేగవంతం చేయాలని సీఎం ఆదేశించారు. విపత్తుల సమయంలో ప్రజలకు అండగా నిలవాలని సూచిస్తూ, సమర్థంగా పనిచేసిన అధికారులను అభినందించారు.

రహదారులపై పడిపోయిన చెట్లను వెంటనే తొలగించాలని, తుపాను కారణంగా పేరుకుపోయిన చెత్తను ఎప్పటికప్పుడు శుభ్రం చేయాలని చంద్రబాబు ఆదేశించారు. పంట నష్టం మినహా ఇతర నష్టాలకు సంబంధించి పరిహారం పంపిణీని వేగవంతం చేయాలని సూచించారు. పంట నష్టాన్ని త్వరగా అంచనా వేసేందుకు సాంకేతికతను వినియోగించి, రైతుల వారీగా వివరాలు సిద్ధం చేయాలని అధికారులకు దిశానిర్దేశం చేశారు. కొబ్బరి సహా ఉద్యాన పంటల చెట్లు, మొక్కలను తిరిగి నాటే అవకాశాలను పరిశీలించాలని, వ్యవసాయ, ఉద్యాన రైతుల నష్టాన్ని భర్తీ చేసేందుకు అందుబాటులో ఉన్న ప్రభుత్వ పథకాలను వర్తింపజేయాలని సూచించారు.