‘ఆదర్శ కుటుంబం’కు అడ్వాన్స్ బుకింగ్స్‌లో జోరు

రెండు దశాబ్దాల తర్వాత విక్టరీ వెంకటేశ్‌, దర్శకుడు త్రివిక్రమ్‌ శ్రీనివాస్‌ కలిసి ‘ఆదర్శ కుటుంబం హౌస్ నంబర్ 47’ (ఏకే47) చిత్రంతో ప్రేక్షకుల ముందుకు వస్తున్నారు. హారిక అండ్ హాసిని క్రియేషన్స్‌ నిర్మించిన ఈ ఫ్యామిలీ డ్రామా రేపు విడుదల కానుంది. సినిమా అడ్వాన్స్ బుకింగ్స్‌ ఆశాజనకంగా ప్రారంభమయ్యాయి. బుకింగ్స్‌ ప్రారంభమైన నిన్న మధ్యాహ్నం నుంచి బుక్‌మైషోలో 26 వేలకు పైగా టికెట్లు అమ్ముడైనట్లు సమాచారం. ఈ ప్రారంభ స్పందన సినిమాపై అంచనాలను పెంచుతోంది. విడుదల తర్వాత ప్రేక్షకుల నుంచి వచ్చే సానుకూల స్పందన బాక్సాఫీస్‌ వద్ద మరింత ఊపునిచ్చే అవకాశం ఉంది.

ఈ చిత్రంలో వెంకటేశ్‌ భార్యగా శ్రీనిధి శెట్టి నటిస్తున్నారు. నివేదా పేతురాజ్‌, సత్య, రావు రమేశ్‌, నారా రోహిత్‌ తదితరులు కీలక పాత్రల్లో కనిపించనున్నారు. థమన్‌ సంగీతం అందించారు. చాలా కాలం తర్వాత వెంకటేశ్‌, త్రివిక్రమ్‌ కలయికలో వస్తున్న ఈ ఫ్యామిలీ ఎంటర్‌టైనర్‌ థియేటర్లలో ఎలాంటి ఆదరణ పొందుతుందో చూడాలి.