నా శరీరం గురించి నాకో క్లారిటీ ఉంది.. ట్రోలర్లకు కత్రినా కైఫ్ కౌంటర్

బాలీవుడ్ నటి కత్రినా కైఫ్ తన శరీరాకృతిపై వస్తున్న విమర్శలకు స్పందించారు. బిడ్డకు జన్మనిచ్చిన తర్వాత మహిళల శరీరంలో మార్పులు రావడం సహజమని తెలిసినా కొందరు బాడీ షేమింగ్‌కు పాల్పడుతున్నారని ఆమె ఆవేదన వ్యక్తం చేశారు. ఇటీవల అంబానీ ఇంట్లో జరిగిన వినాయక చవితి వేడుకలకు భర్త విక్కీ కౌశల్‌తో కలిసి హాజరైన కత్రినా ఫొటోలు వైరల్ అయ్యాయి. ఈ ఫొటోలపై స్పందించిన కొందరు ఆమె బరువు పెరిగిందంటూ ట్రోల్ చేశారు. ఈ నేపథ్యంలో ఓ ఇంటర్వ్యూలో మాట్లాడిన ఆమె.. తల్లి కావడం జీవితంలో ముందడుగు అని, అలాంటి అందమైన దశను అనుభవించిన తర్వాత మళ్లీ గతంలోలా మారాలని ఎందుకు అనుకోవాలని ప్రశ్నించారు.

తల్లి కావడం తన జీవితంలో కొత్త దశ అని, తన బలమైన కోరిక నెరవేరినందుకు సంతోషంగా ఉన్నానని కత్రినా తెలిపారు. ఇతరులు బాడీ షేమింగ్ చేయడం వారి వ్యక్తిగత నిర్ణయమని పేర్కొంటూ, తాను మాత్రం మాతృత్వాన్ని ఆనందంగా ఆస్వాదిస్తున్నానని చెప్పారు. తన ఫిట్‌నెస్‌పై కూడా స్పష్టమైన అవగాహన ఉందని, తన శరీరం ఎప్పుడు చురుగ్గా ఉంటుందో తనకు తెలుసని వివరించారు. కత్రినా కైఫ్, విక్కీ కౌశల్ 2021 డిసెంబర్ 9న వివాహం చేసుకున్నారు. నాలుగేళ్ల తర్వాత 2025 నవంబర్ 7న ఈ దంపతులకు కుమారుడు జన్మించాడు.