యాదాద్రి థర్మల్ ప్లాంట్‌కు కోల్ ఇండియా బొగ్గు సరఫరా..

తెలంగాణలోని యాదాద్రి థర్మల్ విద్యుత్కేంద్రంలో 1,600 మెగావాట్ల సామర్థ్యం కలిగిన 1, 2 యూనిట్లకు కోల్ ఇండియా లిమిటెడ్ (సీఐఎల్) నుంచి బొగ్గు సరఫరా చేసేందుకు కేంద్ర బొగ్గుశాఖ అనుమతించింది. ఇప్పటివరకు సింగరేణి కాలరీస్ ద్వారా ఉన్న బొగ్గు లింకేజీని రద్దు చేసుకుని, కోల్ ఇండియాకు బదిలీ చేయాలని సూచించింది. సెప్టెంబరు 28, అక్టోబరు 21, 2026 తేదీల్లో జరిగిన సమావేశాల అనంతరం స్టాండింగ్ లింకేజీ కమిటీ ఈ మార్పును సిఫార్సు చేసింది. యాదాద్రిలోని రెండు యూనిట్లకు రోజుకు 7,712 టన్నుల బొగ్గు అవసరమవుతుందని అంచనా వేశారు. ఇందులో 1,146 టన్నులను జార్ఖండ్ లేదా పశ్చిమ బెంగాల్‌లోని ఈస్టర్న్ కోల్‌ఫీల్డ్స్ లిమిటెడ్ (ఈసీఎల్), మిగిలిన 6,566 టన్నులను ఒడిశాలోని మహానది కోల్‌ఫీల్డ్స్ లిమిటెడ్ (ఎంసీఎల్) సరఫరా చేయనున్నాయి.

ఈసీఎల్ నుంచి జీ8, ఎంసీఎల్ నుంచి జీ13 గ్రేడ్ బొగ్గును కేటాయించారు. ఈ రెండు రకాల బొగ్గు సింగరేణిలో లభించే జీ9 గ్రేడ్ కంటే నాణ్యమైనవిగా భావిస్తున్నట్లు సమాచారం. కేంద్ర విద్యుత్ మండలి 2024 ఆగస్టు 8న జారీ చేసిన మార్గదర్శకాల ఆధారంగా ఈ కేటాయింపులు చేపట్టారు. ఈసీఎల్, ఎంసీఎల్‌లతో వాణిజ్య ఒప్పందాలు చేసుకోవాలని తెలంగాణ విద్యుదుత్పత్తి సంస్థ (టీజీ జెన్‌కో)కు సూచించారు. యాదాద్రికి ఏటా 1.40 కోట్ల టన్నుల జీ9 బొగ్గు సరఫరా చేస్తామని సింగరేణి 2022లో ఒప్పందం చేసుకున్నప్పటికీ, ఆ గ్రేడ్ ఉత్పత్తి ఏడాదికి 40 లక్షల టన్నులకు మించడం లేదని తెలిపింది. ఈ నేపథ్యంలోనే సరఫరా చేయలేమని రాష్ట్ర ప్రభుత్వానికి సమాచారం ఇచ్చింది. తాజా నిర్ణయంతో రెండు యూనిట్లకు బొగ్గు సరఫరా మెరుగుపడే అవకాశం ఉన్నప్పటికీ, విద్యుత్కేంద్రానికి ఏటా అవసరమయ్యే మొత్తం 1.40 కోట్ల టన్నుల్లో మిగిలిన బొగ్గును ఎక్కడి నుంచి సమకూరుస్తారనేది ఇంకా స్పష్టత రావాల్సి ఉంది.