శ్రీనిధి శెట్టి తక్కువ సినిమాలు చేయడానికి కారణమేంటి?

కేజీఎఫ్ సినిమాతో దేశవ్యాప్తంగా గుర్తింపు తెచ్చుకున్న కన్నడ భామ శ్రీనిధి శెట్టి తాజాగా తన పారితోషికంపై వస్తున్న వార్తలకు స్పందించారు. ఒక్కో చిత్రానికి రూ.7 నుంచి రూ.8 కోట్లు డిమాండ్ చేస్తున్నారంటూ సామాజిక మాధ్యమాల్లో జరుగుతున్న ప్రచారాన్ని ఆమె ఖండించారు. ఈ వార్తల్లో నిజం లేదని, అవన్నీ నిరాధారమైన వదంతులేనని స్పష్టం చేశారు. డబ్బు సంపాదించడమే తన లక్ష్యమైతే గత కొన్నేళ్లలోనే 30 నుంచి 40 సినిమాలు చేసేదాన్నని పేర్కొన్నారు. అయితే, తాను ఎంచుకునే కథలోని బలమైన అంశాలు, తన పాత్రకు ఉన్న ప్రాధాన్యత ఆధారంగానే సినిమాలకు అంగీకరిస్తానని వివరించారు.

తాను ఇప్పటివరకు నటించిన చిత్రాల సంఖ్యను పరిశీలిస్తే భారీ పారితోషికం డిమాండ్ చేస్తున్నాననే ప్రచారంలో అర్థం లేదని శ్రీనిధి అభిప్రాయపడ్డారు. తప్పుడు వార్తలతో ప్రేక్షకులను తప్పుదోవ పట్టించడం సరికాదన్నారు. మరోవైపు, ఆదర్శ కుటుంబం చిత్రంపై ఆసక్తికర విషయాలను వెల్లడించారు. కుటుంబ అనుబంధాలు, యాక్షన్ అంశాలతో పాటు విభిన్నమైన కథనం ఇందులో ఉంటుందని తెలిపారు. ముఖ్యంగా డార్క్ కామెడీ శైలిలో సాగే ఈ సినిమా తనకు ప్రత్యేకమని పేర్కొన్నారు. ఇప్పటివరకు చేయని కామెడీ తరహా పాత్రలో కనిపించబోతున్నట్లు వెల్లడించారు. కథాబలం ఉన్న చిత్రాలకే ప్రాధాన్యత ఇస్తూ, విభిన్నమైన పాత్రలతో ప్రేక్షకులను అలరించాలన్నదే తన ఉద్దేశమని శ్రీనిధి స్పష్టం చేశారు.