సాఫ్ట్‌వేర్ ఉద్యోగాల పేరుతో మోసం.. మయన్మార్‌కు తరలింపు

సింగపూర్‌లో సాఫ్ట్‌వేర్ ఉద్యోగాలు ఇప్పిస్తామని నమ్మబలికి తెలుగు యువతను మోసం చేసిన ముఠాల ఉదంతం తీవ్ర ఆందోళనకు దారితీసింది. దాదాపు 300 మంది యువతను తొలుత కంబోడియాకు, అనంతరం మయన్మార్‌కు తరలించి అక్కడ సైబర్ నేరాలు చేయాలని బలవంతం చేస్తున్నట్లు సమాచారం. బాధితులు రహస్య మార్గాల్లో తమ పరిస్థితిని బయటకు తెలియజేస్తున్నట్లు తెలుస్తోంది.

ఇచ్చిన టార్గెట్లు పూర్తి చేయకపోతే చిత్రహింసలు, విద్యుత్ షాక్‌లు వంటి దారుణాలకు పాల్పడుతున్నారని బాధితులు వెల్లడించినట్లు సమాచారం. మహిళలు లైంగిక వేధింపులను ఎదుర్కొంటున్నట్లు కూడా ఆరోపణలు ఉన్నాయి. రోజుకు 18 గంటల వరకు పని చేయిస్తూ, కనీస సౌకర్యాలు కూడా కల్పించడం లేదని కుటుంబ సభ్యులు ఆవేదన వ్యక్తం చేస్తున్నారు. ప్రభుత్వాలు వెంటనే జోక్యం చేసుకుని బాధితులను సురక్షితంగా స్వదేశానికి తీసుకురావాలని కోరుతున్నారు.