వ్యాపార అవసరాలకు వ్యక్తిగత రుణాలే దిక్కు

చిన్న వ్యాపారులు తమ వ్యాపార అవసరాల కోసం రుణాలు తీసుకుంటున్నప్పటికీ, వాటిలో అధిక భాగం వ్యక్తిగత పేర్లతోనే ఉంటున్నాయి. గత మూడేళ్లలో వ్యక్తిగత పేర్లతో తీసుకున్న రుణాలు తెలంగాణలో ఏటా సగటున 26 శాతం, ఆంధ్రప్రదేశ్‌లో 25 శాతం చొప్పున పెరిగాయి. అయితే సూక్ష్మ వ్యాపార సంస్థల పేరుతో తీసుకున్న రుణాల వృద్ధి తెలంగాణలో 13 శాతం, ఏపీలో 11 శాతానికే పరిమితమైంది. చిన్న వ్యాపారులకు రుణ అవసరాలు పెరుగుతున్నప్పటికీ, సంస్థల పేరుతో రుణాలు పొందడంలో అంతరం కొనసాగుతోందని ట్రాన్స్‌యూనియన్‌ సిబిల్‌, నేషనల్‌ స్మాల్‌ ఇండస్ట్రీస్‌ కార్పొరేషన్‌ (ఎన్‌ఎస్‌ఐసీ) సంయుక్త అధ్యయనం వెల్లడించింది. జూన్‌ 2026 నాటికి తెలంగాణలో సూక్ష్మ వ్యాపారాలకు సంబంధించిన రుణ బాకీలు రూ.1.74 లక్షల కోట్లకు, ఏపీలో రూ.1.45 లక్షల కోట్లకు చేరాయి.

మార్చి 2026 నాటికి తెలంగాణలో 19.6 లక్షల మంది, ఏపీలో 23.8 లక్షల మంది వ్యాపారులు వ్యక్తిగతంగా రుణాలు తీసుకున్నప్పటికీ, తమ వ్యాపార సంస్థల పేరుతో ఇప్పటివరకు రుణం పొందలేదు. ఈ రెండు రాష్ట్రాల్లో అలాంటి వారు మొత్తం 43.4 లక్షల మంది ఉన్నారు. వీరిలో తెలంగాణలో 62 శాతం, ఏపీలో 61 శాతం మందికి సిబిల్‌ స్కోరు 730కి పైనే ఉండటం గమనార్హం. చిన్న వ్యాపారుల రుణాల్లో ఆస్తుల తనఖాపై తీసుకునే రుణాల వాటా తెలంగాణలో 53 శాతం, ఏపీలో 41 శాతంగా ఉంది. వ్యక్తిగత వ్యాపార రుణాల్లో ఎన్‌బీఎఫ్‌సీల భాగస్వామ్యం ఏపీలో 48 శాతం, తెలంగాణలో 38 శాతంగా నమోదైంది. దేశవ్యాప్తంగా సూక్ష్మ వ్యాపారులకు సంబంధించిన మొత్తం వాణిజ్య రుణాలు జూన్‌ 2026 నాటికి రూ.29.6 లక్షల కోట్లకు చేరుకున్నాయి.