కర్ణాటకలో పెరిగిన పాల ధరలు.. రైతులకు భారీ ఊరట

కర్ణాటకలో పాల రైతులకు ఊరటనిస్తూ రాష్ట్ర ప్రభుత్వం కీలక నిర్ణయం తీసుకుంది. పాల ధరను లీటరుకు రూ. 8 పెంచేందుకు కర్ణాటక మంత్రివర్గం ఆమోదం తెలిపింది. ఈ పెంపు నవంబర్ 1 నుంచి అమల్లోకి రానుంది. పెంచిన మొత్తంలో రూ. 7 నేరుగా పాల రైతులకు అందించనుండగా, మిగిలిన రూ. 1ను డెయిరీ సహకార సంఘాలకు కేటాయించనున్నారు. ఈ నిర్ణయంతో ప్రస్తుతం లీటరు పాలకు రైతులకు అందుతున్న రూ. 35 మొత్తం రూ. 42కు పెరగనుంది. పాల ఉత్పత్తిదారులకు ఆర్థికంగా మరింత మద్దతు అందించాలనే ఉద్దేశంతో ప్రభుత్వం ఈ నిర్ణయం తీసుకుంది.

ప్రభుత్వం ఇప్పటికే అందిస్తున్న లీటరుకు రూ. 5 ప్రోత్సాహక మొత్తాన్ని కలుపుకుంటే, రైతులకు లీటరు పాలపై మొత్తం రూ. 47 అందనుంది. పాల రైతులకు మద్దతు ధర పెంచాలని వివిధ పార్టీల సభ్యులు చేసిన విజ్ఞప్తుల నేపథ్యంలో ఈ నిర్ణయం తీసుకున్నట్లు సమాచారం. పెరిగిన ధరలతో పాల ఉత్పత్తిదారులకు ఆదాయం పెరగడంతో పాటు, డెయిరీ సహకార సంఘాలకు కూడా అదనపు నిధులు అందనున్నాయి. కొత్త ధరలు అమల్లోకి వచ్చిన తర్వాత రైతులకు లభించే ప్రయోజనాలపై ఆసక్తి నెలకొంది.