సంపద సృష్టిలో ఎనిమిదో వింత.. ‘కాంపౌండింగ్’ మ్యాజిక్!

ప్రపంచంలో ఏడు వింతలు ఉన్నాయని మనకు తెలుసు. కానీ, ఆర్ధిక ప్రపంచంలో ‘కాంపౌండింగ్’ (చక్రవడ్డీ ప్రభావం) అనేది ఎనిమిదో వింత అని ప్రఖ్యాత శాస్త్రవేత్త ఆల్బర్ట్ ఐన్‌స్టీన్ ఏనాడో చెప్పారు. ఇది కేవలం ఒక మాట కాదు.. సంపద సృష్టిలో తిరుగులేని సూత్రం. పెట్టుబడికి ‘సమయం’ తోడైతే ఫలితం ఎలా ఉంటుందో తెలిపే అద్భుతమే ఈ కాంపౌండింగ్. సాధారణంగా మనం డబ్బును పొదుపు చేస్తాం. కానీ ఆ పొదుపు, పెట్టుబడి రూపం దాల్చి, తిరిగి మనకు రాబడిని తెచ్చిపెట్టినప్పుడే అసలైన సంపద సృష్టి జరుగుతుంది. దీనినే ఇన్వెస్టింగ్ పరిభాషలో ‘కాంపౌండింగ్’ అంటారు. దీర్ఘకాలం పాటు క్రమశిక్షణతో పెట్టుబడిని కొనసాగిస్తే, అది ఒక మంచు ముద్ద (Snowball Effect) లాగా మారి, అనూహ్యమైన కార్పస్ (నిధి)గా ఎలా మారుతుందో తెలుసుకుందాం.

సాంప్రదాయం నుంచి నవీన పంథా వైపు..
గతంలో మన పెద్దలు తమ పొదుపు మొత్తాలను బ్యాంకు ఫిక్స్‌డ్ డిపాజిట్లు (FD), పబ్లిక్ ప్రావిడెంట్ ఫండ్ (PPF) లేదా బంగారంపై మదుపు చేసేవారు. వీటిలో దీర్ఘకాలంలో బంగారం మంచి రాబడిని అందించినప్పటికీ, ఎఫ్‌డీలు, పీపీఎఫ్‌లు ద్రవ్యోల్బణాన్ని తట్టుకుని భారీ సంపదను సృష్టించలేకపోయాయి. గత దశాబ్ద కాలంగా ఈ ధోరణి మారుతోంది. ప్రజలు ఈక్విటీ మార్కెట్లు, మ్యూచువల్ ఫండ్స్ వైపు మొగ్గు చూపుతున్నారు. ఇవి స్వల్పకాలంలో రిస్క్‌తో కూడుకున్నవే అయినా, దీర్ఘకాలంలో (Long Term) సంప్రదాయ పొదుపు పథకాల కంటే అధిక రాబడిని ఇస్తాయి. ఈ అధిక రాబడికి, కాంపౌండింగ్ తోడైతే వచ్చే ఫలితం అద్భుతంగా ఉంటుంది. కాంపౌండింగ్ అంటే కేవలం అసలుపైనే కాకుండా, వచ్చిన రాబడిని తిరిగి పెట్టుబడి పెట్టడం ద్వారా.. ఆ రాబడిపై కూడా రాబడిని పొందడం.

కాంపౌండింగ్ పవర్: ఒక ఉదాహరణ
కాంపౌండింగ్ మహిమను అర్థం చేసుకోవడానికి ఒక చిన్న ఉదాహరణ చూద్దాం.
‘A’ అనే వ్యక్తి రూ. 1,00,000 (ఒక లక్ష) పెట్టుబడి పెట్టాడనుకుందాం. దానికి వార్షిక రాబడి 12% వస్తోందనుకుంటే..
మొదటి ఏడాది: రూ. 1,00,000 అసలుపై రూ. 12,000 రాబడి వచ్చి మొత్తం రూ. 1,12,000 అవుతుంది.
రెండో ఏడాది: ఇక్కడే మ్యాజిక్ మొదలవుతుంది. ఇప్పుడు వడ్డీ అసలు లక్షపై కాకుండా, రూ. 1,12,000 పై లెక్కిస్తారు. దీంతో రెండో ఏడాది చివరకు ఆ మొత్తం రూ. 1,34,400 అవుతుంది.
20 ఏళ్ల తర్వాత: ఆ ఒక్క లక్ష రూపాయలు రూ. 9,64,620కి చేరుకుంటుంది.
25 ఏళ్ల తర్వాత: మరో ఐదేళ్లు ఆగితే.. అది రూ. 17,00,006 అవుతుంది.
30 ఏళ్ల తర్వాత: ఇంకో ఐదేళ్లు ఓపిక పడితే.. ఆ మొత్తం ఏకంగా రూ. 30,00,000 (ముప్పై లక్షలు) దాటుతుంది.

అంటే.. పెట్టిన పెట్టుబడి లక్ష రూపాయలే. కానీ 30 ఏళ్ల సమయం దానికి తోడవ్వడం వల్ల అది 30 రెట్లు పెరిగింది. దీనినే ‘బేస్ ఎఫెక్ట్’ లేదా కాంపౌండింగ్ మ్యాజిక్ అంటారు. సమయం పెరిగే కొద్దీ చివరిలో వచ్చే రాబడి విపరీతంగా ఉంటుంది.
యువతకు స్వర్ణావకాశం
నేటి యువతరానికి ఆర్థిక నిపుణులు ఇచ్చే సలహా ఒక్కటే.. "ఎంత త్వరగా వీలైతే అంత త్వరగా పెట్టుబడి ప్రయాణాన్ని ప్రారంభించండి".
చిన్న వయసులో బాధ్యతలు తక్కువగా ఉంటాయి కాబట్టి, వచ్చే ఆదాయంలో కొంత మొత్తాన్ని సిప్ (SIP) వంటి మార్గాల ద్వారా మ్యూచువల్ ఫండ్స్ లేదా ఈక్విటీల్లో ఇన్వెస్ట్ చేయాలి. అంతేకాదు, కెరీర్‌లో ఎదిగే కొద్దీ, జీతం పెరిగిన ప్రతిసారీ పెట్టుబడిని కూడా అదే నిష్పత్తిలో పెంచుకుంటూ పోవాలి (Step-up). ఇలా చేయడం వల్ల రిటైర్మెంట్ నాటికి లేదా దీర్ఘకాలిక అవసరాలకు ఊహించని సంపద మీ సొంతమవుతుంది.

విజయానికి 4 సూత్రాలు (Quick Bites):
సంపద సృష్టిలో విజయం సాధించాలంటే ఈ నాలుగు నియమాలు పాటించండి:
Start Early: సాధ్యమైనంత త్వరగా పెట్టుబడి ప్రారంభించండి.
Be Consistent: మార్కెట్ ఒడిదుడుకులతో సంబంధం లేకుండా పెట్టుబడిని క్రమం తప్పకుండా కొనసాగించండి.
Long Term: కనీసం 15 నుంచి 20 ఏళ్ల పాటు పెట్టుబడిని కదల్చకండి.
Increase Investments: ఆదాయం పెరిగినప్పుడల్లా పెట్టుబడి మొత్తాన్ని పెంచండి.
పెట్టుబడి ప్రారంభించడానికి ఎప్పుడూ ఆలస్యం అయినట్లు కాదు. ఈరోజే ఆరంభించండి.. కాంపౌండింగ్ మ్యాజిక్‌తో ఆర్థిక స్వేచ్ఛను ఆస్వాదించండి.

రచయిత:
రమన్ గజవెళ్లి,
AMFI రిజిస్టర్డ్ మ్యూచవల్ ఫండ్ అడ్వైసర్.
మెయిల్ ఐడి:
ramang.mfd@gmail.com