జీఎస్‌టీ 2.0 సంస్కరణలే భారత్ ఆర్థిక పటిష్ఠతకు కారణం: మారుతీ ఛైర్మన్ ఆర్‌సీ భార్గవ

కార్ల తయారీ దిగ్గజ సంస్థ మారుతీ సుజుకీ ఇండియా రాబోయే అయిదేళ్లకు రూ.77,500 కోట్ల మూలధన వ్యయాలను కేటాయించింది. 2026-27 నుంచి 2030-31 వరకు సామర్థ్య విస్తరణ, కొత్త మోడళ్ల తయారీ, పరిశోధన మరియు అభివృద్ధి తదితర అవసరాలకు ఈ నిధులు వినియోగించబడనున్నాయి. కంపెనీ ఎండీ మరియు సీఈఓ హిసాషి టకూచి వార్షిక సర్వసభ్య సమావేశంలో ఈ వివరాలను వెల్లడించారు. 2008 నుంచి తయారవుతున్న మారుతీ కార్లన్నీ ఇ20 ఇంధనానికి అనుకూలంగా ఉన్నాయని ఆయన స్పష్టం చేశారు. 2026-27 ఏడాదికి కేటాయింపును రూ.10,000 కోట్ల నుంచి రూ.14,000 కోట్లకు పెంచినట్లు తెలిపారు. గతేడాది ప్రకటించిన రూ.70,000 కోట్ల కంటే ఈసారి మొత్తం మూలధన వ్యయం అధికంగా ఉంది.

జీఎస్‌టీ 2.0 సంస్కరణలు లేకుండా అనిశ్చితుల్లో భారత్ రాణించేది కాదని మారుతీ సుజుకీ ఇండియా ఛైర్మన్ ఆర్‌సీ భార్గవ అన్నారు. పశ్చిమాసియా యుద్ధ ప్రభావం ఉన్నా ఆర్థిక వ్యవస్థ పటిష్ఠంగా నిలబడటానికి ఈ సంస్కరణలే కారణమని ఆయన పేర్కొన్నారు. 2031 నాటికి భారత్‌లో కార్ల పరిశ్రమ 63 లక్షల యూనిట్లకు చేరుకోవచ్చని, చిన్న కార్ల మార్కెట్ వాటా కూడా వేగంగా పెరగగలదని అంచనా వేశారు.