బంగారంపై కేంద్రం సుంకం పెంచింది.. దిగుమతులు భారీగా తగ్గాయి

బంగారంపై దిగుమతి సుంకం పెంపు ప్రభావం స్పష్టంగా కనిపిస్తోంది. కేంద్ర ప్రభుత్వం పసిడి, వెండిపై దిగుమతి సుంకాన్ని 6 శాతం నుంచి 15 శాతానికి పెంచిన తర్వాత దేశంలోకి బంగారం దిగుమతులు దాదాపు 70 శాతం తగ్గినట్లు ఓ ప్రభుత్వ అధికారి తెలిపారు. మే 13 నుంచి పెంచిన సుంకం అమల్లోకి వచ్చింది. గతంలో నెలకు సగటున 75-100 టన్నుల బంగారం దిగుమతి కాగా, ఇటీవల నెల రోజుల్లో ఈ పరిమాణం 25-30 టన్నులకు పడిపోయినట్లు వెల్లడించారు.

విదేశీ మారక నిల్వలను పరిరక్షించడంలో భాగంగా కేంద్రం ఈ సుంకం పెంపు నిర్ణయం తీసుకుంది. దిగుమతి వ్యయం పెరగడంతో పసిడి దిగుమతులపై ప్రభావం పడినట్లు అధికారులు చెబుతున్నారు. గతంతో పోలిస్తే ప్రస్తుతం దిగుమతులు గణనీయంగా తగ్గడం దేశీయ బంగారం మార్కెట్‌పై కూడా ప్రభావం చూపే అవకాశం ఉంది.