ఎఫ్‌డీలు ఇక లాభదాయకం కాదు… పెట్టుబడులను మార్చే సమయమా?

దేశంలో వడ్డీ రేట్లు క్రమంగా తగ్గుముఖం పడుతున్న నేపథ్యంలో ఫిక్స్‌డ్ డిపాజిట్లపై ఆధారపడే వారికి ఆందోళన పెరుగుతోంది. గత ఏడాది కాలంలో ఆర్‌బీఐ రెపో రేటును 1.25 శాతం తగ్గించగా, తాజా ద్రవ్య పరపతి విధానంలో మరో పావు శాతం కోత విధించింది. ధరల ఒత్తిడి అదుపులో ఉండటంతో ఫిబ్రవరిలో మరొకసారి వడ్డీ తగ్గే అవకాశముందని ఆర్థిక వర్గాలు అంచనా వేస్తున్నాయి. దీని ప్రభావంతో బ్యాంకులు ఎఫ్‌డీలపై వడ్డీ రేట్లు తగ్గించేశాయి. ప్రస్తుతం ఏ బ్యాంకూ 8 శాతానికి మించి వడ్డీ ఇవ్వని పరిస్థితి నెలకొంది. దీంతో రిటైరీలు, వృద్ధులు వడ్డీ ఆదాయంపై మాత్రమే ఆధారపడలేని స్థితి ఏర్పడింది.

అయితే ఫిక్స్‌డ్ డిపాజిట్లకు మించిన ప్రత్యామ్నాయాలు ఉన్నాయని నిపుణులు సూచిస్తున్నారు. ముఖ్యంగా డెట్ మ్యూచువల్ ఫండ్స్ రిటైరీలు, సీనియర్ సిటిజన్లకు అనుకూలమని పేర్కొంటున్నారు. ఇవి ప్రభుత్వ రుణపత్రాలు, మంచి క్రెడిట్ రేటింగ్ ఉన్న కంపెనీల బాండ్లలో పెట్టుబడి పెట్టి 6 నుండి 8.5 శాతం వరకు స్థిరమైన రాబడులు అందిస్తాయి. లాక్-ఇన్ పీరియడ్ లేకపోవడంతో అవసరమైనప్పుడు డబ్బు ఉపసంహరణకు వీలుంటుంది. దీర్ఘకాలిక పెట్టుబడులపై ఇండెక్సేషన్ ప్రయోజనం ద్వారా పన్ను భారం కూడా తగ్గించుకోవచ్చు. సరైన పథకాన్ని ఎంచుకుంటే తక్కువ రిస్క్‌తో మంచి ఆదాయం పొందటం సాధ్యమని నిపుణులు చెబుతున్నారు.