స్మార్ట్‌వాచ్‌ అలర్ట్‌తో వ్యక్తికి సకాలంలో వైద్యం

అమెరికాలోని ఒహాయోకు చెందిన మహమ్మద్‌ ఇస్లాం ప్రాణాలను ఆపిల్‌ వాచ్‌లోని ‘ఫాల్‌ డిటెక్షన్‌’ ఫీచర్‌ కాపాడింది. అనారోగ్యంగా అనిపించడంతో ఇంట్లో ఒంటరిగా ఉన్న ఆయనకు శ్వాస తీసుకోవడంలో ఇబ్బంది, చెవి దగ్గర నొప్పి, నడవడంలో సమస్యలు ఎదురయ్యాయి. ఇంటి బయటకు వెళ్తుండగా అకస్మాత్తుగా కుప్పకూలిపోయారు. ఆయన పడిపోవడాన్ని గుర్తించిన ఆపిల్‌ వాచ్‌ వెంటనే స్పందించి అత్యవసర సేవలకు ఆటోమేటిక్‌గా కాల్‌ చేసింది. దీంతో ఆయనను వెంటనే ఆసుపత్రికి తరలించగా, ఊపిరితిత్తుల్లో రక్తం గడ్డకట్టినట్లు వైద్యులు గుర్తించారు.

ఆపిల్‌ వాచ్‌లోని ఫాల్‌ డిటెక్షన్‌ సెన్సార్‌లు వ్యక్తి తీవ్రంగా పడిపోయినప్పుడు గుర్తించి ముందుగా అలర్ట్‌ ఇస్తాయి. వినియోగదారు స్పందించకపోతే 30 సెకన్ల కౌంట్‌డౌన్‌ అనంతరం స్వయంచాలకంగా ఎమర్జెన్సీ సేవలకు కాల్‌ చేస్తుంది. అలాగే ఖచ్చితమైన లొకేషన్‌ను అత్యవసర సిబ్బందికి, ఎమర్జెన్సీ కాంటాక్ట్‌లకు పంపిస్తుంది. 55 ఏళ్లు పైబడిన వారికి ఈ ఫీచర్‌ డిఫాల్ట్‌గా యాక్టివ్‌గా ఉంటుంది. మహమ్మద్‌ ఇస్లాం విషయంలోనూ ఇదే ఫీచర్‌ సకాలంలో సహాయం అందేలా చేసింది.