ఇన్‌స్టాగ్రామ్‌ నుంచి వాట్సాప్‌ వరకు.. మెటా కొత్త సబ్‌స్క్రిప్షన్‌ ఇదే!

మెటా యూజర్ల కోసం ‘మెటా వన్‌’ పేరుతో కొత్త సబ్‌స్క్రిప్షన్‌ సేవను అందుబాటులోకి తీసుకొచ్చింది. ఇన్‌స్టాగ్రామ్‌, ఫేస్‌బుక్‌, వాట్సాప్‌, మెటా ఏఐ సేవలను ఇందులో భాగంగా చేసింది. వ్యక్తిగత యూజర్లు, ఏఐని ఎక్కువగా వినియోగించే వారు, క్రియేటర్లు, వ్యాపారాల కోసం వేర్వేరు ప్లాన్లను ప్రవేశపెట్టింది. సాధారణంగా ఉచితంగా లభించే ప్రాథమిక సేవల్లో మార్పు ఉండదని మెటా స్పష్టం చేసింది. చెల్లింపు ప్లాన్ల ద్వారా అదనపు ఫీచర్లు, విస్తృత ఏఐ వినియోగం, వ్యక్తిగతీకరణ సదుపాయాలు అందనున్నాయి.

వ్యక్తిగత యూజర్ల కోసం ఇన్‌స్టాగ్రామ్‌ ప్లస్‌, వాట్సాప్‌ ప్లస్‌, ఫేస్‌బుక్‌ ప్లస్‌ ప్లాన్లు ఉన్నాయి. ఇన్‌స్టాగ్రామ్‌ ప్లస్‌లో డీఎంలు, స్టోరీస్‌కు కస్టమ్‌ ఫాంట్లు, డీఎం ప్రివ్యూలు వంటి ఫీచర్లు లభిస్తాయి. వాట్సాప్‌ ప్లస్‌లో ప్రత్యేక థీమ్స్‌, ఐకాన్లు, ఎఫెక్ట్‌ స్టిక్కర్లు, అదనపు చాట్‌ పిన్నింగ్‌ వంటి సదుపాయాలు ఉంటాయి. ఇక కోర్‌, ప్రీమియం బండిల్‌ ప్లాన్లలో మెటా ఏఐ ద్వారా ఎక్కువగా చిత్రాలు, వీడియోలు రూపొందించడం, ఎడిట్‌ చేయడం వంటి అవకాశాలు లభిస్తాయి. క్రియేటర్లు, వ్యాపారాల కోసం ఎసెన్షియల్‌, అడ్వాన్స్‌డ్‌, ఎక్స్‌పర్ట్‌, మ్యాక్స్‌ ప్లాన్లను అందిస్తోంది. ఎడిట్స్‌ ప్లస్‌, మెటా బిజినెస్‌ ఏజెంట్‌ వంటి ఫీచర్లను కూడా విస్తరించనున్నట్లు కంపెనీ తెలిపింది. ప్లాన్ల ధరలు, ఫీచర్లు ప్రాంతం, యాప్‌, అకౌంట్‌ను బట్టి మారవచ్చని మెటా పేర్కొంది.