కాన్వా బ్రష్ ఏఐ మోడల్‌ విడుదల.. టెక్స్ట్ ప్రాంప్ట్‌లతో డిజైన్లలో మార్పులు

కాన్వా తన ఏఐ ఆధారిత డిజైన్ టూల్స్ సామర్థ్యాలను మెరుగుపరిచేందుకు Canva Brush పేరుతో కొత్త విజన్-లాంగ్వేజ్ మోడల్‌ను ప్రకటించింది. సంస్థలోని Canva Research బృందం దీనిని అభివృద్ధి చేసింది. సాధారణంగా ఏఐ టూల్స్ కొత్త చిత్రాలను రూపొందించడంపై దృష్టి పెడుతుండగా, Canva Brush ఇప్పటికే ఉన్న డిజైన్‌ను అర్థం చేసుకుని, అందులో అవసరమైన మార్పులు మాత్రమే చేసేలా రూపొందించారు. వినియోగదారులు సాధారణ భాషలో ఇచ్చే సూచనల ఆధారంగా ఒక వాక్యంలోని టెక్స్ట్ నుంచి మొత్తం ప్రెజెంటేషన్‌లోని పలు స్లైడ్‌ల వరకు ఎడిట్ చేయవచ్చు. ఈ ప్రక్రియలో ఫాంట్లు, రంగులు, స్పేసింగ్, చిత్రాలు, లేఅవుట్ వంటి అంశాల్లో ఒకే తరహా శైలిని కొనసాగించేలా మోడల్ పనిచేస్తుందని కంపెనీ తెలిపింది.

ఉదాహరణకు, ఆర్ట్ నూవో శైలిలో మూడు పేజీల బేకరీ పిచ్ డెక్‌ను రూపొందించాలని సూచిస్తే, దానికి అనుగుణంగా కంటెంట్‌ను ప్లాన్ చేయడం, టెక్స్ట్‌ను అమర్చడం, చిత్రాలను ఎంపిక చేయడం, అన్ని పేజీల్లో ఒకే తరహా డిజైన్‌ను కొనసాగించడం వంటి పనులను Canva Brush చేయగలదని సంస్థ వివరించింది. డిజైన్ అంశాల్లో మార్పులు చేసేందుకు కోడ్‌ను రూపొందించి అమలు చేయడంతో పాటు, ఫలితాన్ని పరిశీలించి మరిన్ని మార్పులు చేసే ఏజెంటిక్ విధానాన్ని ఇది ఉపయోగిస్తుంది. ఈ మోడల్ రూపొందించిన అంశాలన్నీ ఎడిట్ చేసుకునే వీలుంటుంది. పనితీరు విషయంలో తమ పాత డిజైన్ ఏజెంట్‌తో పోలిస్తే సాధారణ డిజైన్ ఎడిటింగ్ పనులను 69 శాతం వేగంగా పూర్తి చేయడంతో పాటు, ఒక్కో ఎడిట్‌కు అయ్యే ఖర్చును 46 శాతం తగ్గిస్తుందని కాన్వా పేర్కొంది. ప్రస్తుతం Canva Pro సబ్‌స్క్రైబర్లకు మద్దతు ఉన్న డిజైన్ ఎడిటింగ్ పనుల కోసం ఈ ఫీచర్ అందుబాటులో ఉంది. ఇప్పటికే ఉన్న డిజైన్‌ను Canva AIలో తెరిచి లేదా జతచేసి, డ్రాప్‌డౌన్ మెనూలోని Brush ఎంపిక ద్వారా దీనిని ఉపయోగించవచ్చు.