హైలో ఓపెన్‌లో భారత షట్లర్ల జోరు.. సెమీస్‌కు ముగ్గురు

బీడబ్ల్యూఎఫ్ టూర్ సూపర్ 500 టోర్నీ హైలో ఓపెన్‌లో భారత స్టార్ షట్లర్లు పీవీ సింధు, లక్ష్యసేన్, అన్‌మోల్ ఖర్బ్ సెమీఫైనల్‌కు చేరుకున్నారు. శుక్రవారం జరిగిన మహిళల సింగిల్స్ క్వార్టర్ ఫైనల్లో రెండో సీడ్ పీవీ సింధు 21–12, 21–10తో అమేలియా షుల్‌ను ఓడించింది. కేవలం 28 నిమిషాల్లో ముగిసిన ఈ మ్యాచ్‌లో సింధు ఆరంభం నుంచే ఆధిపత్యం ప్రదర్శించింది. మరో మహిళల సింగిల్స్ క్వార్టర్ ఫైనల్లో భారత క్రీడాకారిణులు అన్‌మోల్ ఖర్బ్, ఆరో సీడ్ ఉన్నతి హుడా తలపడ్డారు.

ఈ పోరులో అన్‌మోల్ ఖర్బ్ 21–17, 18–21, 21–16తో ఉన్నతి హుడాపై విజయం సాధించి సెమీఫైనల్‌కు అర్హత సాధించింది. పురుషుల సింగిల్స్‌లో ఏడో సీడ్ లక్ష్యసేన్ కూడా చివరి నాలుగు దశకు చేరుకున్నాడు. క్వార్టర్ ఫైనల్లో ఫిన్లాండ్‌కు చెందిన కేల్ కొల్జోనెన్‌తో తలపడిన లక్ష్య 14–21, 21–17, 21–13తో గెలిచాడు. 66 నిమిషాల పాటు సాగిన ఈ మ్యాచ్‌లో తొలి గేమ్‌ను కోల్పోయినప్పటికీ, ఆ తర్వాత వరుసగా రెండు గేములు గెలిచి లక్ష్యసేన్ సెమీఫైనల్ బెర్తును ఖాయం చేసుకున్నాడు.