సిరిని సూపర్‌ ఏఐగా మార్చేందుకు యాపిల్‌ మాస్టర్‌ ప్లాన్‌!

తన తదుపరి తరం సిరి ఏఐని మరింత శక్తివంతంగా మార్చేందుకు యాపిల్‌ వార్తా పబ్లిషర్లతో బహుళ సంవత్సరాల కంటెంట్‌ ఒప్పందాలపై చర్చలు జరుపుతున్నట్లు సమాచారం. వాల్‌స్ట్రీట్‌ జర్నల్‌ నివేదిక ప్రకారం.. తాజా వార్తలు, సమాచారాన్ని సిరి ద్వారా వినియోగదారులకు అందించేందుకు పబ్లిషర్ల కంటెంట్‌ను ఉపయోగించుకోవాలని యాపిల్‌ భావిస్తోంది. అయితే ఏ పబ్లిషర్లతో చర్చలు జరుగుతున్నాయన్న విషయం వెల్లడించలేదు.

ఇతర ఏఐ సంస్థలు సాధారణంగా పబ్లిషర్లకు నిర్దిష్ట మొత్తాన్ని చెల్లించే విధానాన్ని అనుసరిస్తుండగా.. యాపిల్‌ కంటెంట్‌ వినియోగానికి అనుగుణంగా చెల్లించే విధానాన్ని పరిశీలిస్తున్నట్లు తెలుస్తోంది. జూన్‌లో జరిగిన WWDC 2026లో యాపిల్‌ కొత్త సిరి ఏఐని పరిచయం చేసింది. వ్యక్తిగత సందర్భాలను అర్థం చేసుకోవడం, స్క్రీన్‌పై ఉన్న సమాచారాన్ని విశ్లేషించడం, వెబ్‌ నుంచి తాజా సమాచారాన్ని తీసుకురావడం వంటి సామర్థ్యాలను కొత్త సిరి కలిగి ఉంటుందని యాపిల్‌ తెలిపింది. ఈ ఏడాది చివర్లో సిరి ఏఐ బీటా వెర్షన్‌ అందుబాటులోకి రానుంది.