ఆపరేషన్‌ సిందూర్‌ తర్వాత తొలిసారి భారత్‌కు రానున్న పాక్‌ మంత్రి

పహల్గాం ఉగ్రదాడికి ప్రతీకారంగా భారత్‌ చేపట్టిన ‘ఆపరేషన్‌ సిందూర్‌’ తర్వాత తొలిసారిగా పాకిస్థాన్‌కు చెందిన ఓ మంత్రి భారత పర్యటనకు రానున్నారు. దిల్లీ వేదికగా నవంబర్‌ 20 నుంచి 22 వరకు షాంఘై సహకార సంస్థ (ఎస్‌సీఓ) ఆధ్వర్యంలో సివిలైజేషన్‌ డైలాగ్‌ ఫోరమ్‌ జరగనుంది. ఈ సమావేశాలకు పాకిస్థాన్‌ పర్యావరణ శాఖ మంత్రి ముసాదిక్‌ మాలిక్‌ హాజరుకానున్నారు. ఈ విషయాన్ని పాకిస్థాన్‌ విదేశాంగ శాఖ అధికారికంగా వెల్లడించింది.

చివరిసారిగా 2023లో గోవాలో జరిగిన ఎస్‌సీఓ సమావేశాలకు అప్పటి పాకిస్థాన్‌ విదేశాంగ మంత్రి బిలావల్‌ భుట్టో జర్దారీ హాజరయ్యారు. ఆ తర్వాత ఆ దేశానికి చెందిన మంత్రులు భారత్‌లో పర్యటించలేదు. ఇప్పుడు ముసాదిక్‌ మాలిక్‌ పర్యటన ఖరారైతే, దాదాపు మూడేళ్ల తర్వాత పాకిస్థాన్‌ మంత్రి భారత గడ్డపై అడుగుపెట్టినట్లవుతుంది. భారత్‌-పాకిస్థాన్‌ మధ్య ఉద్రిక్తతల నేపథ్యంలో ఈ పర్యటనకు ప్రాధాన్యం ఏర్పడింది.