మస్క్ సంస్థ ఎక్స్ ఏఐలో అమన్ గొట్టుముక్కలకి అవకాశం

భారత సంతతికి చెందిన డెవలపర్ అమన్ గొట్టుముక్కల ఎలాన్ మస్క్‌తో కలిసి పని చేయనున్నాడు. ఇటీవల అమన్ తన బృందంతో కలిసి “ఫైర్‌బెండర్” అనే ఏఐ కోడింగ్ అసిస్టెంట్‌ను ప్రారంభించాడు. ప్రోగ్రామర్లు కోడ్‌ను మరింత సమర్థవంతంగా రాయడానికి ఈ టూల్ సహాయపడుతుంది. అధునాతన కోడింగ్ ఏఐ వ్యవస్థల అభివృద్ధిలో భాగమవ్వడానికి తాను ఎలాన్ మస్క్‌కు చెందిన కృత్రిమ మేధ సంస్థ ఎక్స్ ఏఐలో చేరుతున్నట్లు అమన్ సోషల్ మీడియాలో ప్రకటించాడు.

కృత్రిమ మేధ యుగంలో మెరుగైన భవిష్యత్తును నిర్మించడానికి ఎక్స్ ఏఐ సరైన వేదిక అని అమన్ తెలిపాడు. సూపర్ ఇంటెలిజెన్స్ సాధించడానికి అవసరమైన కంప్యూటింగ్ శక్తిని ఈ సంస్థ అందిస్తుందని విశ్వాసం వ్యక్తం చేశాడు. అమన్ ప్రకటనపై ఎలాన్ మస్క్ స్పందిస్తూ అతన్ని ఎక్స్ ఏఐలోకి స్వాగతించారు. అమన్ 2017 నుంచి 2021 మధ్య టెక్సాస్ ఏఅండ్‌ఎమ్ విశ్వవిద్యాలయంలో బ్యాచిలర్ డిగ్రీ పూర్తి చేశాడు. అంతకుముందు టెక్సాస్ అకాడమీ ఆఫ్ మ్యాథమెటిక్స్ అండ్ సైన్స్‌లో చదువుకున్నాడు. ఫైర్‌బెండర్ ప్రారంభానికి ముందు పారాడిగ్మ్‌లో సాఫ్ట్‌వేర్ ఇంజినీర్‌గా పనిచేసి టెక్నాలజీ, క్రిప్టో రంగాల్లో పలు ప్రాజెక్టులపై పని చేశాడు. అతని కుటుంబం కొన్ని దశాబ్దాల క్రితం భారత్ నుంచి అమెరికాకు వెళ్లి అక్కడే స్థిరపడింది.