ఐవీఎఫ్ చికిత్స విఫలమైతే మోసం చేసినట్లు కాదు - అలహాబాద్ హైకోర్టు

సంతాన సాఫల్య చికిత్స అయిన ఇన్ విట్రో ఫెర్టిలైజేషన్ (ఐవీఎఫ్) విఫలమైందనే కారణంతో వైద్యుడిపై నమోదైన క్రిమినల్ కేసును అలహాబాద్ హైకోర్టు కొట్టివేసింది. ఐవీఎఫ్ చికిత్స ఆశించిన ఫలితాన్ని ఇవ్వకపోవడాన్ని మాత్రమే మోసంగా పరిగణించలేమని కోర్టు స్పష్టం చేసింది. వైద్య శాస్త్రం ఎప్పుడూ కచ్చితమైన ఫలితాలను అందించలేదని, చికిత్స విజయవంతం కావడం రోగి శారీరక పరిస్థితులతో పాటు అనేక అంశాలపై ఆధారపడి ఉంటుందని జస్టిస్ చవన్ ప్రకాష్ పేర్కొన్నారు.

మోసం చేయాలనే దురుద్దేశం మొదటి నుంచే ఉన్నట్లు ఆధారాలు ఉన్నప్పుడే ఐపీసీ సెక్షన్ 420 కింద కేసు నమోదు చేయవచ్చని కోర్టు స్పష్టం చేసింది. వైద్య చికిత్స ఆశించిన ఫలితాన్ని ఇవ్వలేదనే కారణంతో మాత్రమే డాక్టర్‌పై క్రిమినల్ బాధ్యతను మోపలేమని పేర్కొంది. ఈ తీర్పు విఫలమైన వైద్య చికిత్సకు, ఉద్దేశపూర్వక మోసానికి మధ్య ఉన్న వ్యత్యాసాన్ని స్పష్టం చేసింది.