ధోనీ రీఎంట్రీపై ఉత్కంఠ...

చెన్నై సూపర్ కింగ్స్‌కు ప్లేఆఫ్స్ ఆశలు నిలబెట్టుకోవాలంటే సన్‌రైజర్స్ హైదరాబాద్‌పై విజయం తప్పనిసరి అయిన సమయంలో ఎంఎస్ ధోనీ రీఎంట్రీపై ఉత్కంఠ నెలకొంది. 12 మ్యాచుల్లో ఆరు విజయాలు సాధించిన సీఎస్‌కే, మిగిలిన రెండు మ్యాచుల్లో గెలిస్తేనే నాకౌట్ అవకాశాలు సజీవంగా ఉంటాయి. దాదాపు ఏడాది తర్వాత ధోనీ మైదానంలోకి దిగుతాడనే ప్రచారం అభిమానుల్లో భారీ ఆసక్తిని రేకెత్తిస్తోంది. చెపాక్‌లోనే ధోనీ రిటైర్మెంట్ ప్రకటించే అవకాశముందనే ఊహాగానాలు కూడా జోరుగా సాగుతున్నాయి.

అయితే మాజీ క్రికెటర్ సునీల్ గావస్కర్ మాత్రం ధోనీ ఈ కీలక మ్యాచ్‌లో ఆడే అవకాశాలు తక్కువగా ఉన్నాయని అభిప్రాయపడ్డారు. గాయం నుంచి పూర్తిగా కోలుకోలేదని, ఏడాదిగా మ్యాచ్‌లు ఆడకపోవడం కూడా కారణమని పేర్కొన్నారు. మరో మాజీ సీఎస్‌కే ఆటగాడు రవిచంద్రన్ అశ్విన్ కూడా ఇదే అభిప్రాయం వ్యక్తం చేస్తూ, ధోనీ వీడ్కోలు 2027లో ఉండొచ్చని సూచించాడు. అలాగే సన్‌రైజర్స్‌తో మ్యాచ్‌కు బ్యాటింగ్ ఆర్డర్‌లో మార్పులు ఉండవని, అకీల్ హుస్సేన్ తుది జట్టులోకి రావొచ్చని అశ్విన్ అంచనా వేశారు.