అమెరికాలో చరిత్ర సృష్టించిన షారుఖ్ ఖాన్ నైట్ రైడర్స్..

బాలీవుడ్ సూపర్ స్టార్ షారుఖ్ ఖాన్ సహ యాజమాన్యంలో ఉన్న నైట్ రైడర్స్ గ్రూప్ ప్రపంచ క్రికెట్ చరిత్రలో అరుదైన ఘనతను సొంతం చేసుకుంది. అమెరికాలో అంతర్జాతీయ ప్రమాణాలతో సొంత క్రికెట్ స్టేడియాన్ని నిర్మించిన తొలి గ్లోబల్ క్రికెట్ ఫ్రాంచైజీగా నిలిచింది. లాస్ ఏంజెల్స్ నైట్ రైడర్స్, వాషింగ్టన్ ఫ్రీడమ్ మధ్య జరిగిన మేజర్ లీగ్ క్రికెట్ తొలి మ్యాచ్‌తో ఈ స్టేడియాన్ని అధికారికంగా ప్రారంభించారు. అమెరికాలో క్రికెట్ అభివృద్ధికి ఇది కీలక మైలురాయిగా భావిస్తున్నారు.

అంతర్జాతీయ ప్రమాణాలతో నిర్మించిన ఈ స్టేడియంలో ఎనిమిది పిచ్‌లు, ఐసీసీ నిబంధనలకు అనుగుణమైన మైదానం, 120 అడుగుల ఎత్తులో ఆరు ఫ్లడ్‌లైట్ టవర్లు, అత్యాధునిక సౌకర్యాలు ఏర్పాటు చేశారు. ఈ ప్రాజెక్ట్ తన కల సాకారమైందని షారుఖ్ ఖాన్ పేర్కొంటూ, ఇది కేవలం స్టేడియం మాత్రమే కాకుండా కుటుంబాలు, అభిమానులు, సమాజాన్ని ఒకే వేదికపైకి తీసుకొచ్చే కేంద్రంగా నిలుస్తుందని అన్నారు. నైట్ రైడర్స్ స్పోర్ట్స్ సీఈఓ వెంకీ మైసూర్ కూడా ఇది క్రికెట్ భవిష్యత్తుపై తమ నిబద్ధతకు ప్రతీక అని తెలిపారు. జూలై 1 నుంచి 5 వరకు ఈ వేదికలో మేజర్ లీగ్ క్రికెట్ మ్యాచ్‌లు జరగనున్నాయి.