

మాస్టర్ బ్లాస్టర్ సచిన్ తెందుల్కర్ తన తొలి పాకిస్థాన్ పర్యటనలో జరిగిన ఓ ఎగ్జిబిషన్ మ్యాచ్ తన కెరీర్లో ప్రత్యేకమైన జ్ఞాపకంగా నిలిచిపోయిందని వెల్లడించాడు. వర్షం కారణంగా ఆడాల్సిన తొలి మ్యాచ్ రద్దవడంతో, స్టేడియానికి వచ్చిన వేలాది మంది ప్రేక్షకులను నిరాశపరచకూడదనే ఉద్దేశంతో నిర్వాహకులు ఎగ్జిబిషన్ మ్యాచ్ ఏర్పాటు చేశారు. అలా తన జీవితంలో తొలిసారి అనధికారిక టీ20 మ్యాచ్ ఆడినట్లు సచిన్ గుర్తుచేసుకున్నాడు. ఆ మ్యాచ్లో తొలుత ముస్తాక్ బౌలింగ్లో రెండు సిక్సర్లు బాదినట్లు తెలిపాడు.
ఆ తర్వాత పాకిస్థాన్ దిగ్గజ స్పిన్నర్ అబ్దుల్ ఖాదిర్ తన వద్దకు వచ్చి, తన బౌలింగ్లోనూ సిక్సర్లు కొట్టాలని సవాల్ చేశారని సచిన్ చెప్పాడు. ఆ సవాల్ను స్వీకరించి ఖాదిర్ బౌలింగ్లో సిక్సర్లు బాదానని, మ్యాచ్ అనంతరం ఆయన తనను అభినందించారని గుర్తుచేసుకున్నాడు. అయితే అదే పర్యటనలో నాలుగో టెస్టులో చేసిన 57 పరుగుల ఇన్నింగ్స్ తన కెరీర్ను మలుపు తిప్పిందని పేర్కొన్నాడు. ముంబయి క్రికెట్ సంఘం ఏర్పాటు చేసిన శరద్ పవార్ మ్యూజియంలో, తన కెరీర్లో ఉపయోగించిన 25 బ్యాట్లతో రూపొందించిన ‘బ్యాటోగ్రఫీ’ విభాగాన్ని సోమవారం సచిన్ ఆవిష్కరించాడు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!