‘నేను చేసిన తప్పేంటి?’.. పార్టీ సస్పెన్షన్‌పై వైఎస్సార్‌సీపీ నేత ప్రసాద్‌రెడ్డి ఆవేదన

వైఎస్సార్‌సీపీ తరఫున కౌన్సిలర్‌గా పోటీ చేసి ఓటమి పాలైన ప్రసాద్‌రెడ్డి.. తనను పార్టీ నుంచి సస్పెండ్‌ చేయడంపై అసంతృప్తి వ్యక్తం చేశారు. తన వద్ద డబ్బులు తీసుకున్నప్పటికీ కొందరు ఓటు వేయకపోవడం వల్లే తాను ఓడిపోయానని ఆరోపిస్తూ.. ఆ మొత్తాన్ని తిరిగి ఇవ్వాలని కోరుతూ బుధవారం ఓ వీడియో విడుదల చేశారు. ఈ వీడియో సామాజిక మాధ్యమాల్లో వైరల్‌ కావడంతో పలమనేరు మాజీ ఎమ్మెల్యే వెంకటేగౌడ స్పందించారు. ప్రసాద్‌రెడ్డిని పార్టీ నుంచి సస్పెండ్‌ చేస్తున్నట్లు ప్రకటించారు.

ఈ చర్యపై గురువారం స్పందించిన ప్రసాద్‌రెడ్డి.. తాను చేసిన తప్పేంటని, తనను సస్పెండ్‌ చేయడం ఎంతవరకు సమంజసమని ప్రశ్నించారు. ఎన్నికల నిబంధనల ప్రకారం రూ.7.5 లక్షలు ఖర్చు చేశానని, స్నేహితుల భోజనాలు, రవాణా కోసం మరో రూ.2.5 లక్షలు వెచ్చించానని తెలిపారు. పార్టీ కోసం కష్టపడి పనిచేసిన తనను ఎందుకు సస్పెండ్‌ చేశారని ప్రశ్నించారు. పార్టీ కోసం శ్రమించే కార్యకర్తలను వదులుకోవద్దని నాయకత్వానికి విజ్ఞప్తి చేశారు. తనపై విధించిన సస్పెన్షన్‌ను ఎత్తివేయాలని కోరారు.