ఐపీఎల్ కెప్టెన్ లతో రేపు బీసీసీఐ మీటింగ్

క్రికెట్ అభిమానులకు వేసవి వినోదాన్ని అందించేందుకు ఐపీఎల్ సిద్ధమవుతోంది. 19వ సీజన్ ప్రారంభానికి ఇంకా నాలుగు రోజులే మిగిలి ఉన్నాయి. టోర్నీ సమీపిస్తున్న నేపథ్యంలో భారత క్రికెట్ నియంత్రణ మండలి (బీసీసీఐ) పది జట్ల కెప్టెన్లతో సమావేశం నిర్వహించనుంది. ఈ నెల 25 (బుధవారం) సాయంత్రం 4 గంటలకు ఈ సమావేశం జరగనుంది. ఈ భేటీలో బీసీసీఐ మరియు పది జట్ల సారథుల మధ్య పలు కీలక అంశాలపై చర్చ జరిగే అవకాశం ఉంది.

ఐపీఎల్ 19వ సీజన్ తొలి దశ మ్యాచ్‌లు ఈ నెల 28 నుంచి ప్రారంభం కానున్నాయి. ఈ నేపథ్యంలో జట్ల ఆటగాళ్లు ప్రస్తుతం నెట్స్ ప్రాక్టీస్‌తో పాటు సన్నాహక మ్యాచ్‌లలో పాల్గొంటూ బిజీగా ఉన్నారు. మెగా టోర్నీ ప్రారంభానికి తక్కువ సమయం ఉండటంతో అన్ని జట్ల కెప్టెన్లతో బీసీసీఐ ప్రత్యేకంగా సమావేశం నిర్వహించనుంది.

క్రిక్‌బజ్ నివేదిక ప్రకారం, ఈ నెల 25 బుధవారం సాయంత్రం 4 గంటల నుంచి 6 గంటల వరకు ఈ సమావేశం జరగనుందని ఫ్రాంచైజీలకు ఇప్పటికే సమాచారం అందింది. ఈ సమావేశంలో టోర్నమెంట్ నిర్వహణకు సంబంధించిన పలు ముఖ్య అంశాలు చర్చించనున్నట్లు తెలుస్తోంది.