ఆసియా క్రీడల్లో భారత్‌కు అదిరిపోయే ఆరంభం..

ఆసియా క్రీడలు 2026లో భారత్‌ పతకాల వేటను ఘనంగా ప్రారంభించింది. మహిళల 10 మీటర్ల ఎయిర్‌ రైఫిల్‌ వ్యక్తిగత, టీమ్‌ విభాగాల్లో ఇలవేనిల్‌ వలరివాన్‌ రెండు రజత పతకాలు సాధించింది. వ్యక్తిగత ఫైనల్లో 252.4 పాయింట్లతో రెండో స్థానంలో నిలిచిన ఇలవేనిల్‌.. జపాన్‌కు చెందిన తైచి హినత చేతిలో కేవలం 0.6 పాయింట్ల తేడాతో స్వర్ణాన్ని కోల్పోయింది. అంతకుముందు సోనమ్‌ మాస్కర్‌, విదర్స వినోద్‌తో కలిసి టీమ్‌ ఈవెంట్‌లోనూ భారత్‌కు రజతం అందించింది. భారత జట్టు 1898.0 పాయింట్లు సాధించగా.. చైనా 1904.2 పాయింట్ల ప్రపంచ రికార్డు స్కోరుతో స్వర్ణం గెలుచుకుంది.

మిక్స్‌డ్‌ మార్షల్‌ ఆర్ట్స్‌లో సుచిక తరియాల్ భారత్‌కు మరో పతకాన్ని ఖాయం చేసింది. మహిళల 60 కేజీల క్వార్టర్‌ఫైనల్లో మంగోలియాకు చెందిన ఆల్టన్‌ బైగల్మాపై 2-0తో విజయం సాధించి సెమీఫైనల్‌కు చేరింది. సెమీఫైనల్లో ఓడిన ఇద్దరికీ కాంస్య పతకాలు లభించడంతో సుచికకు ఇప్పటికే పతకం ఖాయమైంది. బ్యాడ్మింటన్‌లో భారత మహిళల జట్టు కజకిస్థాన్‌ను 3-0తో ఓడించి క్వార్టర్‌ఫైనల్‌కు చేరుకుంది. టేబుల్‌ టెన్నిస్‌లో భారత మహిళల జట్టు సింగపూర్‌పై 3-2తో విజయం సాధించగా.. పురుషుల జట్టు ఇండోనేసియాపై 3-0తో గెలిచి, అనంతరం ఇరాన్‌ చేతిలో 0-3తో ఓడింది.