అమ్మను కలవలేక ఆర్కే కన్నీళ్లు.. బిగ్‌బాస్ హౌస్‌లో ఎమోషనల్‌ సీన్

బిగ్‌బాస్ తెలుగు సీజన్ 10లో పదో వారం ఫ్యామిలీ వీక్ సందర్భంగా కంటెస్టెంట్లు తమ కుటుంబ సభ్యులను కలుసుకుని భావోద్వేగానికి గురయ్యారు. అయితే వర్షిణి, ఆర్కే కుటుంబ సభ్యులు మాత్రం హౌస్‌లోకి రాలేకపోయారు. దీంతో వీకెండ్‌లో నాగార్జున వీరిద్దరికీ మరో అవకాశం ఇచ్చారు. వర్షిణి తల్లి, ఆర్కే తల్లిని గార్డెన్ ఏరియాలోకి తీసుకొచ్చి, వారిలో ఒకరికి మాత్రమే హౌస్‌లోకి ప్రవేశం ఉంటుందని తెలిపారు. ఇంటి సభ్యుల మెజార్టీ ఓట్ల ఆధారంగా ఎవరు లోపలికి రావాలనేది నిర్ణయిస్తామని చెప్పారు.

దీంతో కంటెస్టెంట్లు తమ అభిప్రాయాలను వెల్లడిస్తూ వర్షిణి, ఆర్కేల్లో ఒకరికి ఓటు వేశారు. వర్షిణికి ఈ సమయంలో తల్లి తోడు అవసరమని భావించిన పలువురు ఆమెకు మద్దతు తెలిపారు. త్రిగుణ్‌ కూడా భావోద్వేగానికి గురవుతూ వర్షిణికి ఓటు వేశాడు. మరోవైపు ఆర్పీ, శివ్‌, అమన్‌ తదితరులు ఆర్కేకు మద్దతుగా నిలిచారు. చివరకు వర్షిణికి ఏడు ఓట్లు, ఆర్కేకు నాలుగు ఓట్లు వచ్చాయి. దీంతో వర్షిణి తల్లికి హౌస్‌లోకి వెళ్లే అవకాశం దక్కగా, తన తల్లి లోపలికి రాదని తెలుసుకున్న ఆర్కే కన్నీటిపర్యంతమయ్యాడు.