బిగ్‌బాస్ తెలుగు 10లో హైపర్ ఆది ఫేవరెట్స్ వీళ్లేనా?

బుల్లితెర ప్రేక్షకుల్లో మంచి క్రేజ్ ఉన్న బిగ్‌బాస్ తెలుగు 10 సెప్టెంబర్ 6న గ్రాండ్‌గా ప్రారంభమైంది. ఈ సీజన్‌లో మొత్తం 16 మంది కంటెస్టెంట్లు హౌస్‌లోకి అడుగుపెట్టారు. వీరిలో టీవీ సెలబ్రిటీలు, జబర్దస్త్ ఆర్టిస్టులు, యూట్యూబర్లు, సోషల్ మీడియా ఇన్‌ఫ్లుయెన్సర్లు, కామనర్లు ఉన్నారు. జబర్దస్త్ కమెడియన్లు ఆటో రామ్ ప్రసాద్, పొట్టి నరేష్ కూడా ఈ సీజన్‌లో భాగమయ్యారు. ఈ నేపథ్యంలో తన స్నేహితులైన రామ్ ప్రసాద్, నరేష్‌కు హైపర్ ఆది సోషల్ మీడియా వేదికగా ఆల్ ది బెస్ట్ చెప్పాడు.

అంతేకాకుండా స్టార్ యాంకర్ వర్షిణికి కూడా హైపర్ ఆది మద్దతు తెలిపాడు. వీరిద్దరూ గతంలో ఢీ, శ్రీదేవి డ్రామా కంపెనీ వంటి కార్యక్రమాల్లో కలిసి పనిచేశారు. దీంతో వారి మధ్య మంచి స్నేహం ఏర్పడింది. వీరి ఆన్-స్క్రీన్ కెమిస్ట్రీ ఆధారంగా గతంలో ప్రేమ, పెళ్లి అంటూ ప్రచారం జరిగినప్పటికీ.. తామిద్దరం కేవలం మంచి స్నేహితులమేనని ఆది, వర్షిణి స్పష్టం చేశారు. ప్రతి సీజన్‌లోనూ బిగ్‌బాస్‌కు ప్రత్యేక అతిథిగా వచ్చే ఆది.. ఈసారి రామ్ ప్రసాద్, నరేష్, వర్షిణితో ఎలా వ్యవహరిస్తాడు? ఎవరి ఆటకు మద్దతుగా నిలుస్తాడనేది ఆసక్తికరంగా మారింది.