బిగ్‌బాస్ తెలుగు 10: నాగార్జునతో సండే ఎపిసోడ్‌లో ఫుల్ ఫన్!

బిగ్‌బాస్ తెలుగు 10 ఆదివారం ఎపిసోడ్‌కు సంబంధించిన తాజా ప్రోమోలు చూస్తే నాగార్జున కంటెస్టెంట్లతో కలిసి ఫుల్ ఫన్ చేయించినట్లు తెలుస్తోంది. ఎలిమినేషన్ టెన్షన్‌కు కాస్త బ్రేక్ ఇచ్చిన హోస్ట్.. సండే ఫన్‌డేలో భాగంగా కంటెస్టెంట్లతో పలు సరదా గేమ్స్ ఆడించారు. సినిమా పేర్లకు సంబంధించిన ప్లేకార్డ్స్ చూపించి వాటిని గుర్తించమని అడిగారు. సరైన సమాధానం చెప్పిన తర్వాత ఆయా సినిమాల్లోని పాటలకు కంటెస్టెంట్లతో డ్యాన్స్ చేయించారు. నాగార్జున కూడా వారితో కలిసి స్టెప్పులేస్తూ సందడి చేశారు.

మరో గేమ్‌లో ప్రశ్నలకు సరైన సమాధానం చెప్పిన వారికి చాక్లెట్లు ఇస్తానని నాగార్జున చెప్పారు. దేబ్జానీ, నరేశ్ సరైన సమాధానాలు చెప్పి చాక్లెట్లు అందుకోగా.. ప్రతిసారీ ముందుకొచ్చిన ఝాన్సీకి మాత్రం ఒక్కసారి కూడా చాక్లెట్ దక్కలేదు. దీంతో తనకు ఎందుకు రావడం లేదంటూ ఆమె సరదాగా చేసిన వ్యాఖ్యలు నవ్వులు పూయించాయి. మరో ప్రశ్నలో పడవ ప్రమాదంలో ఎవరిని కాపాడతారు, ఎవరిని ముంచేస్తారనే ప్రశ్నకు ముకేశ్.. వర్షిణిని సేవ్ చేసి, సుదీర్‌ను ముంచేస్తానని చెప్పాడు. నరేశ్ రాంప్రసాద్‌ను ముంచేసి, దేబ్జానీని కాపాడతానని చెప్పాడు. రాంప్రసాద్‌కు ఈత వచ్చంటూ నరేశ్ చెప్పిన సమాధానం అందరినీ నవ్వించింది.