మహేంద్రగిరి వారాహి మూవీ రివ్యూ.. మిస్టరీ థ్రిల్లర్ ఎలా ఉందంటే?

విడుదల తేదీ: సెప్టెంబర్ 11, 2026

నటీనటులు: సుమంత్, మీనాక్షి గోస్వామి, ఐశ్వర్య రాజేశ్, సిద్ధు జొన్నలగడ్డ, మాళవికా నాయర్, మంజు భార్గవి, బ్రహ్మానందం, రాజీవ్ కనకాల, వెన్నెల కిషోర్, వంశీ చాగంటి, కమల్ కామరాజు, శ్రీనివాస్ వడ్లమాని తదితరులు

దర్శకుడు: సంతోష్ జగర్లపూడి

నిర్మాతలు: మధు కలిపు, లక్ష్మణ్

సంగీత దర్శకుడు: అనూప్ రూబెన్స్

సినిమాటోగ్రాఫర్: ప్రతాప్ ఆర్. కృష్ణ

ఎడిటర్: జునైద్ సిద్ధిఖీ

కథ:

మహేంద్రగిరి వంశానికి వారాహి దేవత శాపం ఉందనే నేపథ్యంతో కథ సాగుతుంది. ఆ వంశానికి చెందిన పురుషులు 33 ఏళ్ల వయసులోనే మరణిస్తుంటారు. తరతరాలుగా ఈ శాపం కొనసాగుతున్నా.. దాన్ని తొలగించేందుకు ఆ కుటుంబం చేస్తున్న ప్రయత్నాలు ఫలించవు. హైదరాబాద్‌కు చెందిన యూట్యూబర్ సిద్ధార్థ్ (సుమంత్) ఈ సమస్యతో అనుకోకుండా ముడిపడి, వరుస మరణాల వెనుక ఉన్న మిస్టరీని ఛేదించే సవాలును స్వీకరిస్తాడు.

ప్లస్ పాయింట్లు:

మరణాల నేపథ్యంలో సినిమాను ఆసక్తికరంగా ప్రారంభించారు. సిద్ధు జొన్నలగడ్డ కీలక అతిథి పాత్రలో మెప్పించారు. పరిమిత నిడివి ఉన్నప్పటికీ తన మార్క్ చూపించి, తర్వాతి కథకు మంచి పునాది వేశారు. ఇంటర్వెల్ సన్నివేశం కూడా ఊహించని మలుపుతో ఆసక్తిని పెంచుతుంది. మోసాలు, అక్రమాలను బయటపెట్టే యూట్యూబర్‌గా సుమంత్ సహజంగా నటించారు. మహేంద్రగిరి వంశంలోని మరణాలపై దర్యాప్తు మొదలైన తర్వాత ఆయన పాత్ర మరింత ఆసక్తికరంగా మారుతుంది. ప్రీ-క్లైమాక్స్, క్లైమాక్స్ సన్నివేశాలను చక్కగా తెరకెక్కించారు. ట్విస్టులు, వాటి అనూహ్యత ఆకట్టుకుంటాయి. వంశీ చాగంటి, బ్రహ్మానందం, వెన్నెల కిషోర్ తమ పాత్రల పరిధిలో మెప్పించగా.. మీనాక్షి గోస్వామి కూడా ఫర్వాలేదనిపించారు.

మైనస్ పాయింట్లు:

దర్శకుడు ట్విస్టులను ఆసక్తికరంగా రూపొందించినప్పటికీ.. కొన్ని లాజిక్ అంశాలను పట్టించుకోలేదు. కథలో కీలకమైన దైవ ప్రమేయం చివర్లో మాత్రమే కనిపిస్తుంది. ఇంతటి సమస్య కొనసాగుతున్నప్పటికీ అంతకుముందు దైవ ప్రమేయం ఎందుకు కనిపించలేదనే ప్రశ్నకు సరైన సమాధానం ఉండదు. ఇది కథకు అనుకూలంగా రాసుకున్న అంశంలా అనిపిస్తుంది. మిస్టరీ థ్రిల్లర్‌కు అవసరమైన సాంకేతిక ప్రమాణాలు ఆశించిన స్థాయిలో లేవు. విజువల్ ఎఫెక్ట్స్ అంతగా ఆకట్టుకోవు. ఏఐ వినియోగం కొన్ని చోట్ల అసహనానికి గురిచేస్తుంది. అలాగే ఐశ్వర్య రాజేశ్ పాత్రను ప్రచార చిత్రాల్లోనే వెల్లడించడం వల్ల థియేటర్‌లో ఆ ట్విస్ట్ ప్రభావం తగ్గింది.

మధ్య భాగాన్ని మరింత ఆసక్తికరంగా తెరకెక్కించాల్సింది. కొన్ని సన్నివేశాలను తొలగించి ఉంటే సినిమా మరింత బిగుతుగా ఉండేది. మహేంద్రగిరి వారాహి ప్రాథమిక కథాంశం ‘మురారి’ సినిమాను గుర్తు చేసేలా ఉంటుంది. అయితే కథను నడిపించిన విధానం భిన్నంగా ఉంటుంది.

సాంకేతిక విభాగం:

అనూప్ రూబెన్స్ అందించిన నేపథ్య సంగీతం ఫర్వాలేదనిపిస్తుంది. ప్రతాప్ ఆర్. కృష్ణ సినిమాటోగ్రఫీ బాగుంది. ఎడిటింగ్‌లో మరింత కచ్చితత్వం అవసరమైంది. దర్శకుడు సంతోష్ జగర్లపూడి అనవసరమైన ప్రేమకథలు, ఇతర అంశాల జోలికి వెళ్లకుండా ప్రధాన కథపైనే దృష్టి పెట్టారు. కొన్ని సన్నివేశాలను చక్కగా తెరకెక్కించినప్పటికీ.. సాంకేతిక నాణ్యత, కథలోని లాజిక్ విషయంలో మరింత శ్రద్ధ తీసుకోవాల్సింది.

తీర్పు:

మొత్తంగా ‘మహేంద్రగిరి వారాహి’ కొన్ని ఆసక్తికరమైన మలుపులతో మెప్పించే మిస్టరీ థ్రిల్లర్. ప్రారంభం, ఇంటర్వెల్, క్లైమాక్స్ సన్నివేశాలు ఆకట్టుకుంటాయి. ట్విస్టులు కూడా బాగానే రాసుకున్నారు. అయితే కథలోని కొన్ని లాజిక్ అంశాలు, సాంకేతిక నాణ్యత నిరాశపరుస్తాయి. మధ్య భాగం కూడా అంతగా ప్రభావం చూపదు. మొత్తంగా సినిమా ఓకే అనిపించే మిస్టరీ థ్రిల్లర్.