హామీలు అమలు చేయాలంటే కొడతారా? - వైఎస్ జగన్

గ్రామ, వార్డు సచివాలయ ఉద్యోగుల ఆందోళనపై వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి స్పందించారు. ఉద్యోగుల సమస్యలను పరిష్కరించకుండా శాంతియుత నిరసనలకు వెళ్లిన వారిపై పోలీసులు లాఠీఛార్జ్‌ చేయడం, మహిళా ఉద్యోగులను అడ్డుకోవడం, ఉద్యోగులను అదుపులోకి తీసుకోవడం సరికాదని ఆయన అన్నారు. ఉద్యోగులకు ఐఆర్‌, పీఆర్సీ అమలు కాలేదని, ఐదు డీఏలు పెండింగ్‌లో ఉన్నాయని, మొత్తంగా రూ.40 వేల కోట్ల బకాయిలు ఉన్నాయని జగన్‌ ఆరోపించారు. తమ హామీలను అమలు చేయకపోవడం వల్లే ఉద్యోగులు రోడ్డెక్కాల్సి వచ్చిందని పేర్కొన్నారు.

ధర్నాకు హాజరుకాకుండా ఉద్యోగులను అడ్డుకోవడం, సస్పెండ్‌ చేయడం దారుణమని జగన్‌ విమర్శించారు. గ్రామ, వార్డు సచివాలయ వ్యవస్థపై ప్రభుత్వం కక్షపూరితంగా వ్యవహరిస్తోందని ఆరోపిస్తూ.. శాంతియుత ఆందోళనలపై పోలీసు చర్యలకు ప్రభుత్వం ఎవరి అనుమతి తీసుకుందని ప్రశ్నించారు. ఉద్యోగుల సమస్యలను చర్చల ద్వారా పరిష్కరించాలని, వారి డిమాండ్లపై ప్రభుత్వం స్పందించాలని కోరారు. ఇదిలా ఉండగా, ఉద్యోగుల ఆందోళనలో 141 మందిని అదుపులోకి తీసుకున్నట్లు వైఎస్సార్‌సీపీ నేతలు పేర్కొనగా, పోలీసుల చర్యను పార్టీ నేతలు తీవ్రంగా ఖండించారు.