పంజాబ్‌లో ఆప్‌కు షాక్.. పార్టీని వీడి బీజేపీలో చేరిన ముగ్గురు నేతలు

2027 పంజాబ్ అసెంబ్లీ ఎన్నికలకు ముందు అధికార ఆమ్ ఆద్మీ పార్టీకి వరుస ఎదురుదెబ్బలు తగిలాయి. కేవలం రెండు రోజుల వ్యవధిలో ముగ్గురు నేతలు పార్టీని వీడటంతో రాష్ట్ర రాజకీయాల్లో కొత్త చర్చ మొదలైంది. 2027 ఎన్నికల కోసం ఆప్ 40 మంది అభ్యర్థులతో తొలి జాబితాను ప్రకటించిన మరుసటి రోజు సనౌర్ ఎమ్మెల్యే హర్మీత్ సింగ్ పఠాన్‌మజ్రా, సమానా ఎమ్మెల్యే చేతన్ సింగ్ జౌరమజ్రా పార్టీ ప్రాథమిక సభ్యత్వానికి రాజీనామా చేశారు. ఆ తర్వాత అమృత్‌సర్ నార్త్ ఎమ్మెల్యే కున్వర్ విజయ్ ప్రతాప్ సింగ్ తన శాసనసభ సభ్యత్వానికి రాజీనామా చేస్తూ అసెంబ్లీ స్పీకర్‌కు లేఖ పంపించారు. మాజీ ఐపీఎస్ అధికారి అయిన కున్వర్ విజయ్ ప్రతాప్ 2022 అసెంబ్లీ ఎన్నికలకు ముందు ఆప్‌లో చేరి అమృత్‌సర్ నార్త్ నుంచి విజయం సాధించారు.

సోషల్ మీడియా ద్వారా తన రాజీనామా విషయాన్ని వెల్లడించిన కున్వర్ విజయ్ ప్రతాప్, తనపై ప్రేమాభిమానాలు చూపిన అమృత్‌సర్ ప్రజలకు కృతజ్ఞతలు తెలిపారు. ఎమ్మెల్యేగా తాను నిర్దేశించుకున్న లక్ష్యాల్లో 90 శాతం సాధించానని పేర్కొన్నారు. మాదకద్రవ్యాల సమస్య, అవినీతి, శాంతిభద్రతలు, మౌలిక సదుపాయాలు, బర్గాడి మతవిద్వేష ఘటన వంటి అంశాలను ప్రస్తావించారు. అభ్యర్థుల ఎంపిక, పార్టీ నాయకత్వంపై అసంతృప్తి కారణంగానే ఈ పరిణామాలు చోటుచేసుకున్నాయనే చర్చ రాజకీయ వర్గాల్లో మొదలైంది. ఇదిలా ఉండగా, నవంబర్ 2న ఈ ముగ్గురు నేతలు ఢిల్లీలో బీజేపీలో చేరారు. మొత్తం 117 అసెంబ్లీ స్థానాలకు 2027లో జరగనున్న ఎన్నికలకు ముందే ఆప్‌లో చోటుచేసుకున్న ఈ పరిణామాలు పంజాబ్ రాజకీయాల్లో ప్రాధాన్యం సంతరించుకున్నాయి.