

పశ్చిమగోదావరి జిల్లా భీమవరం మున్సిపాలిటీలో కూటమి పార్టీల మధ్య సీట్ల సర్దుబాటు వివాదం తలెత్తింది. ఈ వ్యవహారంపై కేంద్ర సహాయ మంత్రి భూపతిరాజు శ్రీనివాసవర్మ అసహనం వ్యక్తం చేశారు. పొత్తు ఉన్నప్పటికీ తమకు కేటాయించిన వార్డుల వివరాలు వెల్లడించకుండా తెదేపా, జనసేన నాయకులు అభ్యర్థుల జాబితాలను ప్రకటించడంపై ఆగ్రహం వ్యక్తం చేశారు. సోమవారం భీమవరంలో మీడియాతో మాట్లాడిన ఆయన.. పొత్తుతో సంబంధం లేకుండా అన్ని వార్డుల్లోనూ భాజపా పోటీ చేసే అంశాన్ని పరిశీలిస్తామని స్పష్టం చేశారు.
భీమవరం మున్సిపాలిటీలో మొత్తం 52 వార్డులు ఉండగా, భాజపాకు ఐదు స్థానాలు కేటాయించాలని నిర్ణయించడం, ఎంపీ పాకా సత్యనారాయణ తనయుడికి అవకాశం కల్పించకపోవడం తమ పార్టీని అవమానించడమేనని శ్రీనివాసవర్మ వ్యాఖ్యానించారు. కేటాయించిన ఐదు వార్డుల్లో రెండు స్థానాలకు మాత్రమే అభ్యర్థులను ఖరారు చేశామని, మిగిలిన మూడు స్థానాలపై భాజపా నిర్ణయం తీసుకోకముందే తెదేపా, జనసేనలు చెరో 24 స్థానాలకు అభ్యర్థుల జాబితాలను ప్రకటించడం సరికాదని అభిప్రాయపడ్డారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!