రాజ్యసభ సభ్యులుగా ఎన్నికైన సింఘ్వీ, నరేందర్ రెడ్డి

ఎన్నికల అధికారి నుంచి రాజ్యసభ సభ్యునిగా ఎన్నికైనట్లు ధృవీకరణ పత్రాన్ని అభిషేక్ మను సింఘ్వీ తరపున ఆయన ప్రతినిధులు సురేందర్ మరియు వేం నరేందర్ రెడ్డి స్వీకరించారు. ఈ కార్యక్రమంలో రాష్ట్ర మంత్రులు శ్రీధర్ బాబు, వాకిటి శ్రీహరి, విప్‌లు ఆది శ్రీనివాస్, బీర్ల ఐలయ్య పాల్గొన్నారు. అనంతరం మీడియాతో మాట్లాడిన మంత్రి శ్రీధర్ బాబు, అనుభవజ్ఞులైన అభిషేక్ మను సింఘ్వీ మరియు వేం నరేందర్ రెడ్డి రాజ్యసభ సభ్యులుగా ఎన్నిక కావడం తెలంగాణ ప్రజల ప్రయోజనాలకు ఉపయోగపడుతుందని అన్నారు. తెలంగాణ హక్కులు మరియు నిధుల కోసం ఈ ఇద్దరు కేంద్ర ప్రభుత్వంపై పోరాటం చేస్తారని తెలిపారు. రాష్ట్ర విభజన చట్టంలోని పలు అంశాలపై రాజ్యసభలో చర్చించాల్సిన అవసరం ఉందని ఆయన పేర్కొన్నారు. 

రాజ్యసభకు ఎన్నికైన వేం నరేందర్ రెడ్డి మాట్లాడుతూ, ఈ అవకాశం కల్పించిన ఏఐసీసీ మరియు పీసీసీ నాయకత్వానికి కృతజ్ఞతలు తెలిపారు. 2004 నుంచి 2009 వరకు ఎమ్మెల్యేగా పనిచేసిన అనుభవంతో ఇప్పుడు పార్లమెంట్ వేదికగా తెలంగాణ సమస్యల పరిష్కారం కోసం పోరాటం కొనసాగిస్తానన్నారు. తెలంగాణలో కాంగ్రెస్ అధికారంలోకి రావడానికి తాను పార్టీ కార్యకర్తగా కృషి చేశానని, రాబోయే ఎన్నికల్లో కేంద్రంలో కూడా కాంగ్రెస్ అధికారంలోకి రావడానికి ప్రయత్నిస్తానని తెలిపారు. వివాదాలకు తాను దూరంగా ఉంటానని, సోషల్ మీడియాలో వస్తున్న ప్రచారాలపై వ్యాఖ్యానించనని చెప్పారు. సీఎం రేవంత్ రెడ్డితో తనకు బలమైన స్నేహం ఉందని ఆయన స్పష్టం చేశారు.