

తెలంగాణలో ఇంటర్మీడియట్ బోర్డును రద్దు చేయాలన్న ప్రతిపాదనపై తెలంగాణ రక్షణ సేన చీఫ్ కల్వకుంట్ల కవిత అభ్యంతరం వ్యక్తం చేశారు. ఇలాంటి కీలక నిర్ణయాన్ని ఏకపక్షంగా తీసుకోవద్దని, విద్యార్థులు, తల్లిదండ్రులు, విద్యావేత్తలు, మేధావులతో చర్చించిన తర్వాతే ముందుకు వెళ్లాలని ప్రభుత్వాన్ని కోరారు. హైదరాబాద్లో మీడియాతో మాట్లాడుతూ.. అడ్మినిస్ట్రేటివ్ రిఫార్మ్స్ను విద్యా సంస్కరణలుగా భావించకూడదని అన్నారు. ఇంటర్ బోర్డులో మార్పులు చేయాలంటే మూడు నుంచి పదేళ్ల వరకు సమయం తీసుకుని ప్రణాళికాబద్ధంగా అమలు చేయాలని సూచించారు. డ్రాప్అవుట్లపై ముఖ్యమంత్రి రేవంత్ రెడ్డి చెబుతున్న లెక్కలు సరైనవి కావని విమర్శించారు. ప్రభుత్వం ప్రస్తావిస్తున్న గణాంకాలు ప్రభుత్వ పాఠశాలల విద్యార్థులకు సంబంధించినవి మాత్రమే అయి ఉండవచ్చని, మొత్తం విద్యార్థులను పరిగణనలోకి తీసుకుంటే డ్రాప్అవుట్ల శాతం 16గా ఉందని కవిత పేర్కొన్నారు.
విద్యార్థులు చదువు మానేయడానికి ఆర్థిక ఇబ్బందులు, గ్రామీణ ప్రాంతాల్లో బస్సు సౌకర్యం లేకపోవడం వంటి కారణాలు ఉన్నాయని కవిత తెలిపారు. ముఖ్యంగా ఎస్సీ, ఎస్టీ, బీసీ వర్గాలకు చెందిన విద్యార్థులు ఎక్కువగా ప్రభావితమవుతున్నారని అన్నారు. గుజరాత్లో అమలవుతున్న నమో లక్ష్మి పథకాన్ని ప్రస్తావిస్తూ, విద్యార్థుల ఖాతాల్లోకి ఏటా రూ.928 కోట్ల ఆర్థిక సాయం అందిస్తున్నారని, దీనివల్ల డ్రాప్అవుట్లు 16 శాతం తగ్గాయని ఆమె పేర్కొన్నారు. తెలంగాణలోనూ ఇలాంటి పథకాన్ని అమలు చేయాలని సూచించారు. పదో తరగతి నుంచి ఇంటర్మీడియట్కు వెళ్లే విద్యార్థినుల సంఖ్య ఎక్కువగా ఉందని చెబుతూ, బాలికల నమోదు శాతం 77.4గా, బాలుర శాతం 68.4గా ఉందని కవిత వివరించారు. బాలురలో చదువుపై నిర్లక్ష్యం, మత్తు పదార్థాల వినియోగం వంటి కారణాలతో ఫెయిల్యూర్స్ ఎక్కువగా ఉంటున్నాయని ఆమె వ్యాఖ్యానించారు. ఈ గణాంకాలు, అభిప్రాయాలను కవిత తన మీడియా సమావేశంలో వెల్లడించారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!