

అమెరికాలో హెచ్1బీ వీసా తిరస్కరణ కారణంగా ఉద్యోగ అవకాశాన్ని కోల్పోయిన కునాల్ బహల్, ఆ పరిణామాన్నే తన జీవితంలో కీలక మలుపుగా మార్చుకున్నారు. ప్రస్తుతం ప్రముఖ ఈ-కామర్స్ సంస్థ స్నాప్డీల్ సహ వ్యవస్థాపకుడిగా గుర్తింపు పొందిన ఆయన, తన వ్యాపార ప్రయాణం గురించి ఓ అంతర్జాతీయ మీడియా సంస్థకు ఇచ్చిన ఇంటర్వ్యూలో వివరించారు. అమెరికాలోని పెన్సిల్వేనియా విశ్వవిద్యాలయం నుంచి పట్టభద్రుడైన తర్వాత కునాల్ మైక్రోసాఫ్ట్లో ఇంటర్న్షిప్ చేశారు. అనంతరం అదే సంస్థలో ఉద్యోగంలో చేరారు. అయితే, హెచ్1బీ వర్క్ వీసా కోసం దరఖాస్తు చేసుకోగా అది తిరస్కరణకు గురైంది. దీంతో భారత్కు తిరిగి వచ్చి మైక్రోసాఫ్ట్ భారత కార్యాలయంలో పనిచేసి, ఏడాది తర్వాత మళ్లీ వీసాకు దరఖాస్తు చేసుకోవాలని సంస్థ సూచించినట్లు ఆయన తెలిపారు.
అయితే, అమెరికాలో మరో ఉద్యోగ అవకాశం కోసం ఎదురుచూడకుండా భారత్లోనే సొంతంగా వ్యాపారం ప్రారంభించాలని కునాల్ నిర్ణయించుకున్నారు. తన ఆలోచనను స్కూల్ స్నేహితుడు రోహిత్ బన్సల్తో పంచుకోగా, ఇద్దరూ కలిసి 2007లో కూపన్-బుక్ పేరుతో వ్యాపారాన్ని ప్రారంభించారు. అది క్రమంగా స్నాప్డీల్ అనే ఈ-కామర్స్ ప్లాట్ఫామ్గా అభివృద్ధి చెందింది. 2010 నుంచి వినియోగదారులకు సేవలు అందించడం ప్రారంభించింది. ప్రధాన నగరాలకు దూరంగా ఉన్న చిన్న పట్టణాల్లోని మధ్యతరగతి ప్రజలకు తక్కువ ధరలకు నాణ్యమైన ఉత్పత్తులను అందించడంపై సంస్థ దృష్టి పెట్టింది. కాలక్రమంలో భారత ఈ-కామర్స్ రంగంలో గుర్తింపు సంపాదించుకుని, అమెజాన్, ఫ్లిప్కార్ట్ వంటి ప్రముఖ సంస్థలతో పోటీ పడింది. ఒక ఉద్యోగ అవకాశం చేజారడం కూడా కొత్త వ్యాపార ప్రయాణానికి ఎలా నాంది కావచ్చో కునాల్ బహల్ కథ తెలియజేస్తోంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!