జస్టిస్ పీసీ ఘోష్ కమిషన్ రిపోర్ట్ పై నేడు హైకోర్టు తీర్పు

కాళేశ్వరం ప్రాజెక్టు నిర్మాణంలో జరిగిన అవకవకలపై విచారణ కోసం ఏర్పాటు చేసిన జస్టిస్ పి.సి.ఘోష్ కమిషన్‌పై దాఖలైన పిటిషన్‌లపై హైకోర్టు నేడు తీర్పు వెలువరించనుంది. 2024 మార్చి 14న జారీ చేసిన జీఓ నంబర్ 6 ద్వారా ఈ కమిషన్‌ను ఏర్పాటు చేయగా, దాన్ని రద్దు చేయాలని మరియు కమిషన్ నివేదికను కొట్టివేయాలని పిటిషనర్లు కోరారు. మేడిగడ్డ, అన్నారం, సుందిళ్ల బ్యారేజీల నిర్మాణం, నిర్వహణలో జరిగిన లోపాలపై ఈ కమిషన్ విచారణ చేపట్టింది.

బీఆర్‌ఎస్ అధినేత, మాజీ ముఖ్యమంత్రి కే. చంద్రశేఖర్ రావు, మాజీ మంత్రి టీ. హరీశ్ రావు, ఐఏఎస్ అధికారి స్మితా సభర్వాల్, మాజీ ఐఏఎస్ అధికారి ఎస్.కె. జోషి వేర్వేరుగా ఈ పిటిషన్‌లు దాఖలు చేశారు. చీఫ్ జస్టిస్ అపరేశ్ కుమార్ సింగ్, జస్టిస్ జి.ఎం. మొహియుద్దీన్‌లతో కూడిన బెంచ్ ఇరుపక్షాల వాదనలు విని మార్చి 12న తీర్పును రిజర్వు చేసింది. ఈ రోజు వెలువడనున్న తీర్పు తెలంగాణలో రాజకీయ, పరిపాలనా రంగాల్లో కీలక ప్రభావం చూపే అవకాశం ఉంది.