పార్లమెంట్ సెషన్ పై ఎంపీ లతో డిప్యూటీ సీఎం మీటింగ్

తెలంగాణ డిప్యూటీ సీఎం భట్టి విక్రమార్క గురువారం ప్రజాభవన్‌లో రాష్ట్రానికి చెందిన పార్లమెంట్ సభ్యులను కలిసి సమావేశం నిర్వహించారు. రాబోయే శీతాకాల సమావేశాల్లో ఎత్తి చూపాల్సిన అంశాలు, తీసుకోవాల్సిన విధానాల పై ఈ సమావేశంలో విస్తృతంగా చర్చ జరిగింది.

అధికారులు 12 శాఖలకు సంబంధించిన 47 కీలక అంశాలను పవర్ పాయింట్ ప్రజెంటేషన్ ద్వారా ఎంపీలకు వివరించారు. ఈ సమావేశానికి కాంగ్రెస్ ఎంపీలు మల్లు రవి, బలరాం నాయక్, కడియం కావ్య తో పాటు బీజేపీ ఎంపీలు రఘునందన్ రావు, నగేష్, సీఎస్ రామకృష్ణ రావు హాజరయ్యారు.

డిసెంబర్ 1 నుంచి 19 వరకు పార్లమెంట్ శీతాకాల సమావేశాలు జరగనున్నాయి. ఈ సారి సమావేశాలు  తీవ్రమైన చర్చలతో  కొనసాగే అవకాశం ఉందని భావిస్తున్నారు. ముఖ్యంగా 12 రాష్ట్రాలు, కేంద్రపాలిత ప్రాంతాల్లో ఓటర్ల జాబితా ప్రత్యేక సవరణ కార్యక్రమాన్ని ఎన్నికల సంఘం చేపట్టడం పై ప్రతిపక్షాలు తీవ్ర అభ్యంతరాలు వ్యక్తం చేస్తున్నాయి. ఈ అంశాన్ని పార్లమెంట్‌ లో బలంగా తీసుకువెళ్లి  ప్రభుత్వాన్ని  ప్రశ్నించేందుకు విపక్షాలు సిద్ధమవుతున్నాయి.