నన్ను అరెస్టు చేసే ధైర్యం సీఎం రేవంత్ రెడ్డి చేయరు. కేటీఆర్

తెలంగాణ భవన్‌లో మీడియాతో మాట్లాడిన సందర్భంగా బీఆర్ఎస్ వర్కింగ్ ప్రెసిడెంట్ కేటీఆర్ పలు తీవ్రమైన వ్యాఖ్యలు చేశారు. రేవంత్ రెడ్డి తనను అరెస్టు చేయడానికి ధైర్యం చేయరని స్పష్టం చేస్తూ, జరుగుతోన్న రేస్ కేసులో తనపై ఎలాంటి ఆరోపణలు లేవని, ప్రభుత్వం కూడా దీనిని తెలిసే ఉందని అన్నారు. తనకు భయం ఏదీ లేదని, అవసరమైతే లై డిటెక్టర్ టెస్టుకైనా సిద్ధంగా ఉన్నానని కేటీఆర్ వెల్లడించారు.

అదే సమయంలో రాజకీయ పరిణామాలపై కూడా స్పందించారు. కడియం శ్రీహరిని రక్షించేందుకు దానం నాగేందర్‌తో ముందుగా రాజీనామా చేయించే ప్రయత్నం జరుగుతోందని ఆయన ఆరోపించారు. పార్టీ మార్చిన ఎమ్మెల్యేలపై అనర్హత నిర్ణయం వస్తే ప్రభుత్వ ప్రతిష్ట దెబ్బతింటుందని భావించి ముందుగానే రాజీనామాలు చేయించేందుకు కాంగ్రెస్ ప్రయత్నిస్తోందని విమర్శించారు.

ముందుగా జీహెచ్ఎంసీ ఎన్నికలు, ఆ తరువాత పలు ఉపఎన్నికలు జరిగే అవకాశముందని కేటీఆర్ వ్యాఖ్యానించారు. రాబోయే నెలల్లో రాష్ట్ర రాజకీయాల్లో వేడి పెరిగే అవకాశం ఉందని ఆయన అభిప్రాయపడ్డారు.