తెలంగాణను ఏటీఎంగా మార్చారు.. కాంగ్రెస్‌పై కేటీఆర్‌ తీవ్ర విమర్శలు

తెలంగాణను కాంగ్రెస్‌ అగ్రనేత రాహుల్‌గాంధీ ఏటీఎంగా మార్చుకున్నారని, ముఖ్యమంత్రి రేవంత్‌రెడ్డి ఏటీఎం కార్డులా మారారని భారత రాష్ట్ర సమితి (భారాస) కార్యనిర్వాహక అధ్యక్షుడు కేటీఆర్‌ విమర్శించారు. ఎన్నికల సమయంలో 420 హామీలతో ప్రజలను నమ్మించిన రాహుల్‌గాంధీ, అధికారంలోకి వచ్చిన తర్వాత వాటి అమలుపై స్పందించడం లేదని ఆరోపించారు. ప్రభుత్వం ఏర్పడి వెయ్యి రోజులు గడుస్తున్నా ఆరు గ్యారంటీలు, 13 డిక్లరేషన్లను ఎందుకు అమలు చేయలేదని ప్రశ్నించారు. ఆదివారం హైదరాబాద్‌లోని తెలంగాణ భవన్‌లో ఖైరతాబాద్‌ నియోజకవర్గానికి చెందిన మైనారిటీ నాయకుడు జిబ్రాన్‌ షరీఫ్‌ కేటీఆర్‌ సమక్షంలో భారాసలో చేరారు. ఈ సందర్భంగా కేటీఆర్‌ మాట్లాడుతూ, ఎన్నికలకు ముందు అశోక్‌నగర్‌లో నిరుద్యోగులతో సమావేశమై ఇచ్చిన హామీలను రాహుల్‌గాంధీ గుర్తు చేసుకోవాలని అన్నారు. రాష్ట్రంలో జరుగుతున్న అవినీతి ఆరోపణలపై ఆయన మౌనం వహించడానికి కారణమేంటని ప్రశ్నించారు. సీఎం కుటుంబ సభ్యులకు సంబంధించిన భూములు, వ్యాపార ఒప్పందాలపై వస్తున్న ఆరోపణలకు రేవంత్‌రెడ్డి సమాధానం చెప్పాలని, రూ.వెయ్యి కోట్ల వ్యాపార ఒప్పందం వెనుక ఉన్న వివరాలను వెల్లడించాలని డిమాండ్‌ చేశారు.

ప్రజా సమస్యలపై ప్రశ్నిస్తే సమాధానం చెప్పకుండా అక్రమ కేసులతో బెదిరిస్తున్నారని కేటీఆర్‌ ఆరోపించారు. కేంద్రంలోని భాజపా ప్రజల మధ్య విభేదాలు సృష్టిస్తుంటే, రాష్ట్రంలోని కాంగ్రెస్‌ ప్రభుత్వం ప్రజలను దోచుకుంటోందని విమర్శించారు. 2028లో కేసీఆర్‌ మరోసారి ముఖ్యమంత్రి కావడం ఖాయమని ధీమా వ్యక్తం చేశారు. ఈ కార్యక్రమంలో మాజీ మంత్రులు తలసాని శ్రీనివాస్‌యాదవ్‌, మహమూద్‌ అలీ తదితరులు పాల్గొన్నారు. మరోవైపు, న్యాయవాద వృత్తిలోకి అడుగుపెట్టిన పలువురు యువ న్యాయవాదులు ఆదివారం తెలంగాణ భవన్‌లో కేటీఆర్‌ను కలిశారు. ఈ సందర్భంగా ఆయన మాట్లాడుతూ, పట్టభద్రుల ఓటర్ల జాబితాలో తమ పేర్లను నమోదు చేసుకోవాలని, ఎన్నికల్లో భారాస అభ్యర్థికి మద్దతు ఇవ్వాలని వారిని కోరారు.