అంగన్‌వాడీ కేంద్రాలే చిన్నారుల భవిష్యత్తుకు బలమైన పునాదులు - మంత్రి సీతక్క

మంత్రి డా. దనసరి అనసూయ సీతక్క హైదరాబాద్ జిల్లా గోల్కొండ ప్రాజెక్టు పరిధిలోని మల్లేపల్లి సెంటర్, మహాత్మా గాంధీ నగర్ అంగన్‌వాడీ కేంద్రాల్లో నిర్వహించిన “అమ్మ మాట – అంగన్‌వాడీ బాట” కార్యక్రమంలో పాల్గొన్నారు. నాంపల్లి ఎమ్మెల్యే మజీద్ హుస్సేన్‌తో కలిసి చిన్నారుల నమోదు కార్యక్రమాన్ని ప్రారంభించిన ఆమె, ప్రీ-స్కూల్ విద్యార్థులకు యూనిఫాంలు పంపిణీ చేసి, ప్రాథమిక పాఠశాలల్లో చేరనున్న చిన్నారులకు విద్యారంభ ధృవపత్రాలు అందజేశారు. చిన్నారులతో కలిసి అక్షరాభ్యాస కార్యక్రమంలో పాల్గొని, వారి అభ్యాస పురోగతి, పోషకాహార సేవలు, బోధన సామగ్రి వినియోగాన్ని పరిశీలించారు.

ఈ సందర్భంగా మంత్రి సీతక్క మాట్లాడుతూ అంగన్‌వాడీ కేంద్రాలు కేవలం పోషకాహార కేంద్రాలు కాకుండా చిన్నారుల భవిష్యత్తును తీర్చిదిద్దే తొలి విద్యాలయాలని పేర్కొన్నారు. రాష్ట్రవ్యాప్తంగా 9 లక్షల మంది చిన్నారులు అంగన్‌వాడీల్లో నమోదు అయ్యారని, వారికి నాణ్యమైన విద్య, పోషకాహారం, ఆరోగ్య సేవలు అందిస్తున్నామని తెలిపారు. బ్రేక్‌ఫాస్ట్ పథకాన్ని రాష్ట్రవ్యాప్తంగా విస్తరించనున్నట్లు వెల్లడించిన ఆమె, ప్రతి తల్లిదండ్రి తమ పిల్లలను అంగన్‌వాడీల్లో చేర్పించి ప్రభుత్వ సేవలను వినియోగించుకోవాలని పిలుపునిచ్చారు.