టీవీకేకు మద్దతుపై అన్నాడీఎంకేలో చీలిక

తమిళనాడులో రాజకీయంగా పెద్ద పరిణామం చోటు చేసుకుంది. నటుడు విజయ్ నేతృత్వంలోని తమిళగ వెట్రి కళగం (TVK) 108 సీట్లతో అతిపెద్ద పార్టీగా అవతరించగా, మెజార్టీకి అవసరమైన 118 సీట్లకు కేవలం 10 సీట్లు మాత్రమే దూరంలో ఉంది. ఈ నేపథ్యంలో టీవీకేకు మద్దతు ఇవ్వాలని అన్నాడీఎంకే సీనియర్ నేత, ఎమ్మెల్యే సీ.వి. షణ్ముగం ప్రతిపాదించారు. డీఎంకేను ఎదుర్కోవాలంటే టీవీకేతో కలిసి నడవాలని ఆయన అభిప్రాయపడ్డారు. ఈ ప్రతిపాదనకు అన్నాడీఎంకేలో సగానికి పైగా ఎమ్మెల్యేలు మద్దతు ఇచ్చినట్లు సమాచారం.

అయితే ఈ నిర్ణయంపై పార్టీలో తీవ్ర భిన్నాభిప్రాయాలు వ్యక్తమవుతున్నాయి. ఒక వర్గం టీవీకేకు మద్దతు ఇవ్వాలని కోరుతుండగా, మరో వర్గం తీవ్రంగా వ్యతిరేకిస్తోంది. దీంతో అన్నాడీఎంకేలో చీలిక ఏర్పడినట్లు తెలుస్తోంది. పార్టీ ప్రధాన కార్యదర్శి ఎడప్పాడి కె. పళనిస్వామిపై ఎమ్మెల్యేలు ఒత్తిడి తీసుకువస్తున్నారని సమాచారం. అదే సమయంలో టీవీకే–అన్నాడీఎంకే మధ్య చర్చలు జరుగుతున్నట్లు వార్తలు వస్తుండగా, కాంగ్రెస్ ఇప్పటికే టీవీకేకు మద్దతు ప్రకటించడం తమిళనాడు రాజకీయాల్లో ఉత్కంఠను పెంచుతోంది.