థియేటర్ వేరు.. ఓటీటీ వేరు.. ‘పెద్ది’లో కొత్త మార్పులు!

రామ్ చరణ్ హీరోగా నటించిన ‘పెద్ది’ సినిమా ఇప్పుడు నెట్‌ఫ్లిక్స్‌లో తెలుగు సహా పలు దక్షిణాది భాషల్లో స్ట్రీమింగ్ అవుతోంది. ఓటీటీలో సినిమా చూసిన ప్రేక్షకులు థియేటర్ వెర్షన్‌తో పోలిస్తే కొన్ని సన్నివేశాల్లో మార్పులు ఉన్నాయని సోషల్ మీడియాలో చర్చిస్తున్నారు. ముఖ్యంగా జాన్వీ కపూర్‌కు సంబంధించిన కొన్ని సన్నివేశాలు థియేటర్లలో విమర్శలకు గురికావడంతో ఇప్పుడు వాటిలో మార్పులు చేసినట్లు ప్రేక్షకులు చెబుతున్నారు.

ప్రేక్షకుల అభిప్రాయం ప్రకారం, గతంలో వివాదాస్పదంగా మారిన కొన్ని కెమెరా షాట్ల స్థానంలో ఇప్పుడు సాధారణ ఫ్రేమ్‌లను ఉపయోగించినట్లు కనిపిస్తోంది. అయితే ఈ మార్పులపై నెట్‌ఫ్లిక్స్ లేదా చిత్రబృందం నుంచి ఎలాంటి అధికారిక ప్రకటన వెలువడలేదు. బుచ్చిబాబు దర్శకత్వంలో రూపొందిన ఈ చిత్రానికి ఏఆర్ రెహమాన్ సంగీతం అందించగా, మొత్తం 3 గంటల 5 నిమిషాల నిడివితో ఓటీటీలో అందుబాటులో ఉంది.