తమిళనాడులో బర్డ్ ఫ్లూ అలర్ట్: 14 జిల్లాల్లో కాకుల మృతి, ప్రజలకు ఆరోగ్యశాఖ హెచ్చరిక

తమిళనాడు రాష్ట్రంలోని 14 జిల్లాల్లో బర్డ్ ఫ్లూ వ్యాప్తి చెందిందని ఆరోగ్యశాఖ అధికారులు తెలిపారు. అడయార్ ప్రాంతంలో జనవరి 5 నుంచి వరుసగా కాకులు మృతిచెందాయి. వాటి నమూనాలను పరిశీలించిన జాతీయ పశువైద్య పరిశోధన సంస్థ, ఆ కాకుల మరణానికి బర్డ్ ఫ్లూ కారణమని నిర్ధారించింది.

ఈ నేపథ్యంలో చెన్నై నగరంతో పాటు తిరువళ్లూర్, తిరువణ్ణామలై, కడలూరు వంటి మొత్తం 14 జిల్లాల్లో కాకులు బర్డ్ ఫ్లూ వల్ల మృతిచెందుతున్నట్లు అధికారులు వెల్లడించారు. పుదుచ్చేరి ప్రాంతంలో కూడా ఇలాంటి సంఘటనలు నమోదయ్యాయి.

అయితే ఈ వ్యాధి ఇప్పటివరకు ఇతర పక్షులకు లేదా మనుషులకు సోకలేదని ఆరోగ్యశాఖ స్పష్టం చేసింది. అయినప్పటికీ ప్రజలు జాగ్రత్తగా ఉండాలని, ఎవరికైనా జ్వరం లేదా అనారోగ్య లక్షణాలు కనిపిస్తే వెంటనే ఆసుపత్రికి వెళ్లి పరీక్షలు చేయించుకోవాలని అధికారులు సూచించారు.