ఏపీలోనే టికెట్ ధరలు ఎందుకిలా పెరుగుతున్నాయి?

థియేటర్‌కు కుటుంబంతో కలిసి వచ్చే సామాన్య ప్రేక్షకుడిని దృష్టిలో పెట్టుకుని టికెట్ ధరలు ఉండాలనే అభిప్రాయం చాలాకాలంగా ఉంది. భారీ బడ్జెట్ సినిమాలకు టికెట్ రేట్లు పెంచడం ఒకప్పుడు ప్రత్యేక సందర్భంగా ఉండేది. కానీ కొంతకాలంగా దాదాపు ప్రతి చిత్రానికి ఈ విధానం సాధారణమైపోయింది. అయితే తెలంగాణలో ప్రస్తుతం కొన్ని పెద్ద సినిమాలకు మాత్రమే అదనపు ధరలకు అనుమతులు లభిస్తున్నాయి. మరోవైపు ఆంధ్రప్రదేశ్‌లో మాత్రం వరుసగా చిత్రాలకు రేట్ల పెంపు కనిపిస్తుండటం చర్చనీయాంశంగా మారింది. ముఖ్యంగా తెలంగాణలో సాధారణ ధరలతో వస్తున్న సినిమాలకు ఏపీలో అదనపు రేట్లు ఎందుకు అన్న ప్రశ్నలు ప్రేక్షకుల్లో వినిపిస్తున్నాయి. ఇతర రాష్ట్రాల చిత్రాలకు సొంత ప్రాంతం కంటే ఏపీలో ఎక్కువ ధర ఉండటంపైనా విమర్శలు వస్తున్నాయి.

ఈ అక్టోబర్‌లో రానున్న రణబాలి, ఆదర్శ కుటుంబం, జైలర్ 2 చిత్రాలకు ఇదే పరిస్థితి కనిపిస్తోంది. తెలంగాణలో సాధారణ టికెట్ ధరలతోనే విడుదలవుతుండగా, ఏపీలో మాత్రం ఒక్కో టికెట్‌పై 50 రూపాయల అదనపు ధర ఉండనున్నట్లు సమాచారం. ముఖ్యంగా జైలర్ 2కు తమిళనాడు కంటే ఏపీలోనే ఎక్కువ రేటు పడటం ఆసక్తికరంగా మారింది. ఈ వ్యత్యాసంపై సామాజిక మాధ్యమాల్లో మూవీ లవర్స్ చర్చ మొదలుపెట్టారు. టికెట్ ధరలు సినిమాల ఫలితాలపై ప్రభావం చూపుతున్న నేపథ్యంలో, అన్ని ప్రాంతాల్లో స్పష్టమైన విధానం ఉండాలని వారు కోరుతున్నారు. లేకపోతే ప్రేక్షకులు థియేటర్లకు దూరమై, ఓటీటీ వైపు మరింతగా వెళ్లే అవకాశం ఉందనే అభిప్రాయాలు వినిపిస్తున్నాయి.