బిగ్ బాస్ హౌస్‌లోకి ఎంట్రీ కావాలా?.. ఆడిషన్స్‌పై నాగార్జున కీలక ప్రకటన

తెలుగులో అత్యంత ప్రజాదరణ పొందిన రియాలిటీ షో ‘బిగ్ బాస్’ తన ప్రతిష్టాత్మక పదో సీజన్‌కు సిద్ధమవుతోంది. విజయవంతంగా తొమ్మిది సీజన్లు పూర్తి చేసుకున్న ఈ షో కోసం నిర్వాహకులు ‘బిగ్ బాస్ 10 అగ్నిపరీక్ష’ పేరుతో ప్రత్యేక ప్రోమోను విడుదల చేశారు. సామాన్యులకు బిగ్ బాస్ హౌస్‌లోకి ప్రవేశించే అవకాశం కల్పిస్తూ కొత్త సీజన్‌ను మరింత ఆసక్తికరంగా రూపొందిస్తున్నారు. గత సీజన్ల మాదిరిగానే ఈసారి కూడా అక్కినేని నాగార్జున హోస్ట్‌గా కొనసాగనున్నారు. తాజా ప్రోమోలో ఆయన ఈ సీజన్ మరింత కఠినంగా, ఉత్కంఠభరితంగా ఉండబోతుందని తెలిపారు.

జూన్ 12 నుంచి జూన్ 20 వరకు ఆసక్తి ఉన్న అభ్యర్థులు తమ ఆడిషన్ వీడియోలను పంపవచ్చని నిర్వాహకులు ప్రకటించారు. కనీసం మూడు నిమిషాల నిడివి ఉన్న వీడియోను అధికారిక వెబ్‌సైట్‌లో అప్‌లోడ్ చేయాలని సూచించారు. గత సీజన్‌ల మాదిరిగానే ఈసారి కూడా సామాన్యులు సెలబ్రిటీలతో సమానంగా పోటీ పడే అవకాశం పొందనున్నారు. స్టార్ మా మరియు జియోహాట్‌స్టార్ భాగస్వామ్యంతో రూపొందుతున్న ఈ సీజన్ మరింత గ్రాండ్‌గా, వినోదాత్మకంగా ప్రేక్షకుల ముందుకు రానుంది.